10 June bodo news 2022 ~ Bodoinfo.com

मोजां खौरां, गासैबो आयदा नि आनजाद खौ होजोबनो मोनालासै नो हायार सेकन्दारि 2थि बोसोर आव मोनहैसिगोन दानि गिबि बोसोर नि फरायसाफोरा। फिन आनजाद खुङालासै नो गिबि बोसोर खौ पास खालामना होनो बिथोन होयो सोलोंथाय बिफान आ। आनजाद नि कनत्रलार पंकज बरथाकुर नि लाईजाम आव बे बिथोनखौ होनाय नुनो मोनदों, बेयाव लिरदों, आनजाद खौ मिथिंगायारि आरो लोगोसे गुबुन जेंना नि थाखाय फरायसाफोरा आनजाद खौ होनो हायासै, बेखायनो बिसोर गासैखौबो पास खालामना होनो नांगौ, लोगोसे सोलोंथाय फसंथान नि गाहाय नो फरायसाफोरनि आगोलनि आनजाद नि नम्बर खौ काउन्सिल नि पर्तेल आव सोनो बिथोन होदों जाहाथे फरायसाफोरनि मार्कशित बानायनो हायो।

सोर-सोर ग्रेद 3 आरो 4 नि साख्रि खौ एप्लाई खालामदोंमोन, रायजो नि बेकार सुबुंफोरनि थाखाय मोजां खौरां। आसामनि गिबि मन्थ्रि आ बेनि लिरनाय आनजाद जागोन नि खालारखौ फोसावना होबाय। रायजो सोरखार आ गुबुन गुबुन बिफान नि ग्रेद 3 आरो 4 नि आनजादफोरखौ आगस्त दान आव खुंनायनि थिरांथा लादों। मैया जनता भवन आव आसामनि गिबि मन्थ्रि नि दैदेननाय आव जानाय सावरायमेल आव बे थिरांथा खौ लायो. गोबां गोजौ थाखो नि बिबानगिरिफोरजों सावरायलायनायनि उनाव 4 ग्रेद नि साख्रि नि थाखाय 7 आगष्त आव आनजाद आरो ग्रेद 3 नि साख्रि नि थाखाय 21 आगष्त आव आनजाद खुंनायनि थिरांथा लायो। नाथाय ग्रेद 3 नि नो सालायग्रा एबा द्राईभार नि आनजाद नि खालारखौ थि खालामनाय जायाखै होनना बो बिथाङा रोखा खआलामना होदों। बे साख्रि थिसननायनि सायाव गिबि मन्थ्रि आ बुंदों दि गासैबो एप्लाई खालामगिरि बिथांमोननिसिम सोरखार आ गासैखौबो मोजां गोग्गो लामा जों गासैबो खामानि खौ मावगोन होननानै। मखजाथावदि 3थि ग्रेद नि लांदां जानाय मासि नि थाखाय गासै 6,71,805 या एप्लाई खालामदों आरो ग्रेद 4 नि थाखाय 4,43,655 आ एप्लाई खालामदों।

एनदिएफबि नि गायसनगिबि आफादगिरि रन्जन दैमारि जों लोगोसे आरो सानैसो बारग एनदिएफबि नि सोद्रोमाफोरनि सायाव बिजिरसालि आ 14 जुनखालि जोबथा रायखौ होगोन नि खौरां मोनदों, बेनि गेजेरजों जाहाथे रन्जन दैमारि बिथाङा उदां जायो बेनि थाखाय थानसालि आव आरज गाबदों, बाक्सा जिला नि बाक्सा जिला नि बेतबारि नि थाईजौगुरि गामि नि थागिबिफोरा जाहाथे उदां जायो बेनि थाखाय नो बाथौ थानसालि आव आरज खालामो होनना खौरां मोनदों। आसा खालामो बिथाङा थाबैनो उदां जागोन।

भारत आ फैगो 25 जुलाई आव गोदान हादरगिरि मोनगोन। दानि हादरगिरि रामनाथ कोबिन्द बिथाङा 24 जुलाई आव 5 बोसोर आबुं जागोन। मैया बिसायखथि आयोग आ हादरगिरि नि थाखाय थाबैनो बिसायखथि जागोनखौ फोसावनानै होदों। फैगो 18 जुलाई आव जागोन बिसायखथि आ, नमिनेशनलाई गथायनायनि जोबथा खालार आ 29 जुन, गावनि मुं खौ लाफिननो हागोन 2 जुलाई सिम। भत आ 18 जुलाई आव जानायनि उनाव बेनि साननाय आ 21 जुलाई आव जागोन, 21 जुलाई आव नो गोदान हादरगिरि जागोनखौ मिथिगोनब्लाबो नाथाय 25 जुलाई आव सो समायखिरा खौ लागोन। खौरां मोननाय बादिब्ला 4033 एमएलए आरो 776 एमपि फोरा भत खौ होगोन। जायनो देरहागोन बिथाङा नो भारत नि 16 थि हादरगिरि जागोन।

बितिसि नि गाहाय प्रमद बर बिथांनि न आव थांदोंमोन सिदाब्लिउई गेलेगिरि राजु गयारि आ। राजु गयारि बिथाङा रां नि आंखाल आव गावनि गेलेनायखौ दोनथनो गोनां जादोंमोन। साननैसो सिगाङाव हाजिरा मावना जानायनि मोनसे खौरां सो भाईरेल जादोंमोन, रां नि आंखाल आव गेलेनायखौ दोनथनानै गेलेनायनि सोलाय खामानि मावना सो जानो गोनां जादोंमोन, खौरां मोननाय बिथाङा बितिसि नि गाहाय बिथांनिफ्राय मदद बिनो थांदोंमोन। गाहाय बिथाङा लिरदोः दिनै आंनि देरायाव नुजाथिफैनाय जोबोर रोंगौथि गोनां आरो खमलायनायाव फोरोंथाय मोन्नाय चिरां जिल्लानि राजु गयारि खौ लोगो मोन्नानै जोबोर गोजोन्नाय मोनबाय । बिथां लाइमोना जोबोरैनो रोंखा-राखा आरो इउनाव बिटिआर आरो आसामखौ गोग्गाहोगोन । बिथाङा गावनि गोरिब रांखान्थियारि थासारिखौ फोरमायदोंमोन । बिथांनि सिमांखौ जाफुंसार होनो थाखाय हानायसिमखौ नाजागोन होन्नानै बिथांनो खोथा होनाय जायो ।

मिरु एबसुनि आफादगिरि मानावगेदेद मुस्रि दिपेन बर'आ दिनै दिपक बर' आरो मनदिप बर'नि नखराव थांनानै खौरां लाहैनायजों लोगोसे गाहाम हामलाइथि बाउहैदों । आसामनि सेबाजों खुंजानाय देग्लाइनि मेट्रिक आनजादनि फिथाइखौ थांनाय 7 जुन 2022 खालाराव फोसावनाय जादोंमोन ।देग्लाइनि मेट्रिक आनजादनि फिथाइ फोसावनायाव गुबुन गुबुन बिजोंनिफ्राइ गासै सा 55 फरायसाया 10थि मासियाव आवग्रिनो हादोंमोनब्लाबो नाथाइ बर' बिजोंनिफ्राइ सा 2 फरायसाया 97% नम्बर लानानै एसेयावनो थाथ'नो गोनां जायो । बेखौनो मिरु एबसुनि आफादगिरि मानावगेदेद मुस्रि दिपेन बर'आ दिनै बागसा जिल्ला कुमारिकाता इउ.एन.एकाडेमिनिफ्राइ 97 % लानानै उथ्रिसारनो हानाय दिपक बर' आरो अदालगुरि जिल्ला खैराबरि इउ.एन.एकाडेमिनिफ्राइ 97% नम्बर लानानै उथ्रिसारनो हानाय मनदिप बर'नि नआव थांनानै खौरां लाहैनायजों लोगोसे गाहाम हामलाइथि बाउहैदों । बे खौरां लाहैनायाव मिरु एबसुनिनो नेहाथारि आनान्द दैमारीजों लोगोसे बागसा आरो अदालगुरि जिल्ला एबसुनि दैदेनगिरिफोरा बाहागो लाफायो ।

रेकर्द खालामबाय नेशनेल हायवे अथरिति अफ ईन्दिया या। मिरु नि मन्थ्रि नितिन गादकारि आ बुंदों दि NHAI गिनिज वर्ल रेकर्द खालामनो हादों, 53 नं माहारियारि राजालामा खौ थादनाय गैयाजासे 75 कि मि बानायनायनि रेकर्द। बेखौ मन्थ्रि बिथाङा त्वित खालामदों। मखजाथावदि थांनाय 3 जुन नि फुंनि 7.27 निफ्राय लामा बानायनायखौ जागायनानै दोलो आ 7 जुन नि बेलासि नि 5 बाजि सिम गासै 75 किमि बानायदोंमोन, 105 घन्ता 33 मिनित सम लामा खौ बानायनायनि रेकर्द खालामनो हायो।

गोबाङानो सोंगासिनो हायार सेकन्दारि गिबि बोसोर नि एदमिशन आ माब्ला जागोन होनना। खौरां मोननाय बादिब्ला हायार सेकन्दारि गिबि बोसोर नि गुबुन गुबुन सोलोंथाय फसंथानफोराव एदमिशन नि थाखाय अनलाईन आ सोलिगासिनो दं, थांनाय 7 जुन निफ्राय नो सोलिगासिनो दं, बेयो 18 जुन सिम थागोन, अनलाईन खौ darpan.ahseconline.in नङाब्ला ahsec.assam.gov.in नि गेजेरजों खालामनो हागोन। अनलाईन खालामनाय आ गोनांथार। गुबुनफारसे जायफोरा मेत्रिक आनजाद नि रिजाल्त खौ लानानै गोजोननाय मोनाखै एबा सन्देह दं, बिथांमोननि थाखाय सेबा या अनलाईन पर्तेल खुलिना होगोन, जायनि गेजेरजों बहि खौ नायफिनहोनो हागोन, बेखौ 10 जुन निफ्राय हागोन, फुंनि 6 बाजि निफ्राय, आरो बेयो 20 जुन सिम थागोन मोनाबिलि नि 5 बाजि सिम, सेबा नि अनलाईन पर्तेल sebaonline.org आव थांनानै खालामनो हागोन, मोनफ्रोमबो आयदा नि फिननाय बहि खौ नायफिनहोनोब्ला 350 रां आरो नायफिनहोनायजों लोगोसे फत कपि बियोब्ला 550 रां होनो नांगोन होनना खौरां मोनदों। गुबुनफारसे दायो गोबां फरायसाफोरा नो हायार सेकन्दारि आनजाद नि रिजाल्त नि खौरां खौ नेगासिनो। दासिम हायार सेकन्दारि नि रिजाल्त नि जेबो खौरां गैथवा। माबाफोर खौरां मोनोब्ला भिदिअ नि गेजेरजों होगोन।

बे सावगारि नि भिदिअ खौ थ नोंथांमोना गोबां गुबुननि भिदिअफोराव ससे ससे नुदों जानो हागौ, बिथाङा सासे बारग एमपि आरो लोगोसे तिभि एंकरमोन बो, साधारनयै गोबां मिम फोराव नुनो मोननाय जायो, गोबां सावरायजादोंमोनबो, बिथाङा गावनिख्रुय 31 बोसोर उन्दै हिनजावसा खौ हाबा खालामनानै गोबां सावरायजादोंमोन। बे सुबुं नि मुङा पाकिस्तान नि आमिर लियाकत, खौरां मोननाय बादिब्ला बे आमिर नि गोथै देहा खौ गावनि न आव मोननाय जादों, खामानि मावनाय सुबुं आ बे खौरां खौ होयो। सा 3 हाबा खआलामनाय आमिर आ 3थि हाबा नि थाखाय गोबां सावरायजादोंमोन, दानिया शाह खौ हाबा खालामनाय आ, थांनाय दान आव गारलायनाय बो जादोंमोन, बेफोरनि बादैबो गोबां खौरां खोनानो मोनदोंमोन, दायो जिउ गोमाबाय। थैनाय समाव बैसो आ 49 मोन।

एमएलए निफ्राय मन्थ्रि जाबाय नन्दिता गार्लोसा आरो जयन्त मल्ल बरुवा या, दिनै बिथांमोना मन्थ्रि महरै समायखिरा लाबाय। बेलासि नि 3 बाजि आव श्रिमन्त शंकरदेब कलाक्षेत्र आव हाबाफारि आव समायखिरा लायो, मिथिना मोननाय बादिब्ला नन्दिता गार्लोसा नो power department, Cooperation department, mines & minerals department, Indigenous & tribal faith and culture बिफान खौ होदों। गुबुनफारसे जयन्त मल्ल बरुवा नो public health engineering department, Skill, employment & Entrepreneurship, Tourism बिफान खौ होनाय जायो।

साननैसो सिगाङाव बोथोर आ मोजां जानायनि उनाव दायो फिन गाज्रि महर लागासिनो। सा सानजा भारत आव गोबां अखा हानायनि जाहोनाव हा गिसिखानाय जाथायजों लोगोसे दैबाना जानायखौ नुनो मोनदों। खौरां मोननाय बादिब्ला मेघालय नि गारो हिल्स आव हा गिसिखानायनि थाखाय सा 4 सुबुंफोरनि जिउ गोमादों। गारो हिल्स आव दाबनै जायगा याव जानाय जाथाय आव सा 3 नि मोनसे नखर आरो सासे उन्दै गथ नि जिउ गोमादों। सोनाब गारो हिल्स नि गाम्बेग्रे ब्लक ओनसोल आव 32 कि मि आरो तुरा निफ्राय 45 कि मि सो गोजानाव जादों जाथाय आ, गुबुनफारसे खोला सोनाब गारो हिल्स नि बेकांसि ओनसोल आव हा गिसिखानायनि थाखाय 2 खावसे बोसोर बैसो नि गथ नि जिउ गोमादों होनना खौरां मोनदों।