14 June bodo news 2022 ~ Bodoinfo.com

मेत्रिक आनजाद नि फिथायखौ फोसावनायनि उनाव नो रायजो नि गोबां सोरखारि फरायसालि आरो फोरोंगिरिफोरनि बेरेखा गोरा बेबस्था लानायनि ईंगित होदों रायजो नि गिबि मन्थ्रि आ। रायजो नि 60 जौखोन्दो फरायसालि नि फिथाय आ मोजांब्लाबो 40 जौखोन्दो नि आ गाज्रिथार जाना दं। सोरखारि हिसाब नि बादिब्ला 103 फरायसालि नि फिथायय आ लाथिख। बेबायदि थासारि आव गाज्रि फिथाय नि सोरखारि फरायसालिफोरनि बेरेखा गोरा थिरांथा लानायनि थांखि सोरखार नि। गिबि मन्थ्रि आ बुंनाय बादिब्ला रायजो नि गोबां फरायसालि नि फोरोंगिरिफोरा फोरोंथायनि मुङाव एलआईसि नि एजेन्त नि सो खामानि मावना दं, बेफोरबायदि नि थाखाय नो रिजाल्त आ गाज्रि जादों होनना साननाय जादों, बेखायनो एलआईसि एजेन्त महरै खामानि मावनाय फोरोंगिरि नि फारिलाय नागिरदों गिबि मन्थ्रि आ। मखजाथावदि रिजाल्त फोसावनायनि सिगां निफ्राय नो बेबायदि मोननै मोननै खामानि मावनायफोरनि बेरेखा नोजोर होदोंमोन सोरखार आ। दायो बिथांमोना अफिसियेल नतिस दिहुननानै बेनि सायाव बेबस्था लागोनखौ फोरमायो।

फोरोंगिरि निफ्राय 20 लाख रां दाबि खालामना लानानै हमजाबाय नंखाय एनदिएफबि। बङायगांव पुलिस नि जे आव सानै नंखाय एनदिएफबि, 20 लाख रां दाबि खालामदोंमोन सासे फोरोंगिरि निफ्राय, नर्थ बङायगांव नि सासे फोरोंगिरिनिफ्राय गावखौनो एनदिएफबि होनना सिनायथि होनानै मबाईल जों रां दाबि खालामदोंमोन होनना खौरां मोनदों। उनाव पुलिसफोरा नायबिजिरनानै सानै सेंग्राफोरखौ हमो। पुलिस नि आखाय आव हमजानाय सानै सुबुं नि मुङा अभिजित सरकार आरो मिन्तु राय होनना मिथिना मोनदों। जाथायनि सोमोन्दै मिथिनाय बादिब्ला गोबाव सान निफ्राय नो फोरोंगिरिनिफ्राय मबाईल नि गेजेरजों रां दाबि खालामबाय थादोंमोन,, उनाव फोरोंगिरि नि एजाहार नि सायाव नायबिजिरनानै पुलिसफोरा हमो। बिसोरनिफ्राय मबाईल खौ जब्द खालामो, जाथाय आ ओनसोलनाङैनो सोमोनांहोदों।

हायदाराबाद एफसि आ फुतबस गेलेनो मोजां मोनग्राफोरनि थाखाय मोनसे मोजां सुबिदा होनो थांगासिनो। फैगो 20 जुन निफ्राय अपेन त्राईल्स जागोन फुतबल नि। खौरां मोननाय बादिब्ला 20 जुन खालि आन्दार 15 नि आ जागोन, बेवहाय 2008 आरो 2009 आव जोनोम जानायफोरान मोनगोन होनना लिरदों। बेबायदि नो 21 जुन आव आन्दार 18 नि फोरनि खौ लागोन, 2005 आरो 2006 आव जोनोम जानायफोरा मोनगोन। 22 जुन आव फाईनेल आ जागोन सायखजानायपोरनि गेजेराव। क्लाब, एकादेमि नङाब्ला स्कुल लेबेल नि गेलेग्रापोरनि थाखाय बे सुबिदा खौ होदों। त्राईल्स होनो थांनायय समाव गांनै पासपर्त साईज फत, जोनोम नि फोरमान बिलाय आरो आधार नङाब्ला पासपर्त लांनो होदों। फुंनि 7 बाजि आव नो मोनहैनांगोन. जायगा या कक्राझार जिलि ना बागानसालि नि कक्राझार गभमेन्त कलेज नि खाथि नि KDSA फिल्द आव। गावनि जानाय आदार आरो लोंनाय दै खौ लांफानो होदों। माबाफोर सोंनो दंब्ला स्क्रिन आव नाम्बारखौ होदों।

दिनै 14 जुन 2022 इं खालाराव देग्लाइनि 16थि कमल कुमार ब्रह्म देरहासाद बान्था- 2022 "नि मान बाउनाय हाबाफारिखौ एबसुआ सिरां जिल्ला बेंटलनि जांख्रिखां फोथाराव खुंफुंनो थाखाय लाहार फाहार खालामगासिनो ।

मान बाउनाय हाबाफारिखौ मोजाङै मोजां जाफुंसारनाय बादि मिरु एबसुनि गाहाइ नेहाथारि मानगोनां मुस्रि खनिन्द्र बसुमतारीया थावनिखौ नाइगिदिंदों ।साफ्रोमबो मेलेमजिबि, दिथागिरि आरो राइजो राजाफोरनि बाहागो लानानै फरायसाफोरखौ थुलुंगा होनो मिरु एबसुनि गाहाइ नेहाथारिया बयखौबो खावलायहरदों।

अरुनुदय बिथांखि खौ लानानै आसामनि गिबि मन्थ्रि नि गोनांथार पोसावनाय। गोबां सुबुंफोरनि नाम दानजानो हागौ बे बिथांखि निप्राय। 7 जुलाई निफ्राय रायजो आव जागायगोन अरुनुदय सप्ताह, गोदान साख्रि मोननाय फोरा गारनो नांगोन अरुनुदय बिथांखि खौ। 20 रोजा एनसिसि केदेत आ न न थांनानै सालायगोन नायबिजिरनायखौ। गंसे गामि नि थाखाय सा 3 सा 3 एनसिसि केदेत आ थांगोन। नाम दानजानायजों लोगोसे गोदान नाम बो सोनाय जागोन होनना बुंदों बिथाङा।

सम्बारखालि सिरां जिला सदर काजलगांव आव फरायसालि आव ओंखाम संग्राफोरनि ईउनियन नि गोबां मावथिफोरा धर्ना हाबाफारि लादोंमोन। रायजो नि सोरखारि फरायसालिफोरा खम रां आव नो बोसोर बोसोर खामानि मावनायनि उनाव दायो सोरखार आ बे खामानि खौ नो गुबुन फालांगियारि एबा सोरखारि नङि फसंथान नो होनो नागिरनायनि बेरेखा धर्ना होयो। बे थिरांथा खौ थाबैनो बोखारनो, सोरखार आ होनो गोनां रां खौ होनाय, खामानि नि रैखाथि नि बेबस्था, पेन्सन, फाहामथाय आव मदद बायदि बायदि दाबि फोरखौ दैखाङो। काजलगांव बाजार न निफ्राय गोबां ओंखाम संग्राफोरा मोनसे धर्ना हाबाफारि लानानै जिला शर्बशिक्सा नि मावखुलि नि मोखाङाव लोगो जानानै दाबि आरो स्लगानजों दुंहाव खालामो। उननि समाव गासैबो लोगो नांनानै गिबि मन्थ्रि नि सिम गांसे गोसोखांवाय गथायो।

थांनाय 7 जुन खालि 2022 माइथायनि फोसावनाय मेट्रिक आनजादाव मोजाङै उथ्रिसारनाय फरायसाफोरखौ गाजा-गोमजायै बरायदों खैराबारि इउ एन एकाडेमिआ ৷ खैराबारि इउ एन एकाडेमिनि फरायसालि नयंआव खैराबारि द’खरा एबसुनि आफादगिरि हेम कुमार बसुमतारिनि आफाद सामलायनायाव खुंनाय बराय मेलाव गाहाय आलासि महरै बाहागो लायो टंला जौमा फरायसालिनि लोगो बिबुंगिरि रुपम बर’आ ৷ बिथांआ गावनि बिबुंथिआव बिदिन्थि महरै रायथिनानै बुङो दि मोनसे लामा हान्थिनानै तिनिआलि एबा सारिआलि मोनहैब्ला गावनि थांनो गोनां लामाखौ आन्दायोब्ला जेरैबादि गुबुननिआव थि लामाखौ थं लानो गोनां जायो बिदिनो फरायसाफोराबो मिथि मोनै आरो बुजि मोनै खोथाफोरखौ गेदेमा सुबुंफोरनिफ्राय सोंना लानो नांगौ होन्ना फोरमायो ৷फरायसालिनि गोरायुं बाथारि बरसेङाजों लोगोसे फरायसालि सामलाय आफादनि गोबां दैदेनगिरि,बिगोमा-दिथागिरि आरो ब्रै जौनिबो बारा फरायसा फोरा बाहागो लानाय बे बराय मेलाव दख’रानि गोबां फरायसा दैदेनगिरिफोराबो बाहागो लायो ৷ मख’जायोदि,देग्लाइ 2022 माइथायनि मेट्रिक आनजादाव बे खैराबारि इउ एन एकाडेमि फरायसालिनिफ्राय गासै 81 सा फरायसाआ आनजादाव जिरायदोंमोन ৷ बिनिनो सा 80 फरायसाआ उथ्रिसारना मुं गोजों खालामो ৷ गासै सा 6 आ दिस्टिंसन,सा 16 आ ॺ्टार मार्क,सेथि थाखोआव सा 22 ,नैथि थाखोआव सा 30 आरो थाम थाखोआव सा 6 आ उथ्रिसारनो हादोंमोन ৷ दिनै दिॺ्टिंसन लानानै उथ्रिसारनाय फरायसाफोरखौ गांफायै आर’नाय,बिजाबनि थफ्ला आरो बोसोरसेनि दान बान्था रां अनसुंथाय बाउहरो फरायसालि खुंथाय आफादनिफ्राय ৷

आयेन बेरेखा यै भारत आव फैनानै 18 सान बारनायनि उनाव फिन गावनि जायगा याव थांफिननाय समाव नो सानै चिन नि नोगोरारि हमजादों। खौरांमोननाय बायदिब्ला बिसोरहा जेबो रोखोमनि गनायथि बिलाय गैयामोन भारत आव फैनायनि। थांनाय 24 मे आव नेपाल जानानै भारत आव फैदोंमोन। 10 जुन सिम उत्तरप्रदेश नि नयदा याव लोगो नि न आव थानायनि उनाव तेक्सि जों सितामारि जानानै नेपाल आव थांनाय समाव नो एसएसबि जवानफोर हमो, सानै सुबुं नि मुङा ल लें आरो युन हेलां, बिसोरखौ दायो सोंगासिनो दं। गिबि नायबिजिरनाय आव बिसोरनिफ्राय जेबो फोरमान बिलाय मोनाखै भारत आव थानो हानायनि। बिसोरनिफ्राय जब्द खालामनाय मुवा बेसाद आरो मबाईल निफ्राय बिसोर माबा मोनसे रांखान्थिया लेनदेन एबा बेलेबेजे खालामनायजों सोमोन्दो थानो हागौ नि सन्देह खालामनाय जादों।

पुलिस आ लादोंमोन जरिमाना, बेनि फिनसाजा होनो लाईनमेन आ दानबाय थाना नि मोब्लिब फोनांजाबनायखौ। हादर आव सानफ्रोमबो माबा नङा माबा मोनसे सोमोनांथाव जाथाय आ जाबायनो थायो। मोननैसो आ साधारन सुबुंफोरखौ मिनिहोयोबो। बेबायदि नो जाथाय खौ खालामदों सासे लाईनमेन आ। त्रेफिक नेम खौ मानियैनि जरिमाना होनांनाय लाईनमेन आ रागा जोंनानै थाना नि कानेक्शन खौ नो दानना होयो। जाथाय आ उत्तर प्रदेश नि बरैलि नि। सासे एसआई आ जरिमाना खालामदोंमोन भगवान श्वरुप मुंनि लाईमेनखौ। गारि नि दकुमेन्त्स दिन्थिनो होदोंमोन, नाथाय दिन्थिनो हायि आव जरिमाना होनो नाङो।

मिजोराम आव बारा जालांनो हमदों आफ्रिकान स्वाईन फ्लु नि अनजिमा या। दासिम जागायनायनिफ्राय 5000 सो अमा थैबाय। थांनाय फेब्रुवारि दान निफ्राय हमोब्ला बेखौ गोबां मोनदों, रबिबार नि सान आव बो 39 ता अ थैदों होनना खौरां मोनदों। रायजो नि जुनार फिसिनाय बिफान नि बादिब्ला 4848 सो अमाफोर थैबाय थांनाय फेब्रुवारि निफ्राय। लोगोसे 4077 ता अमाफोरखौ बुथारनाय बो जादों, रायजो नि 11 ता जिला नि 68 गामि आव बे बेराम आ गोसारजोबदों। मखाजाथावदि रायजो सोरखार आ खहा जाजानाय सुबुंफोरनो 50 जौखोन्दो रां होगोन होनना फोरमायदों, थांनाय बोसोर आव बो 33417 अमा फोर थैदोंमोन बे एखे बेराम नि थाखाय नो। थांनाय बोसोरनि दिसेम्बर दान निफ्राय जागायदोंमोन बारा केस मोननाय या। बेनि थाखाय नो थांनाय एप्रिल दान नि 2 खालार आव नो अमा फाननाय फोरखौ बेन खालामना होदोंमोन सोरखार आ।