21 June evening news 2022 ~ Bodoinfo.com

रायजो नि फोरोंगिरिफोरा एलआईसि, खौरांगिरि आरो राजखान्थि बायदिफोरजों सोमोन्दो थानो मोना होनना फोसावना होनायनि उनाव नो दाईरेक्तर अफ सेकन्दारि ईदुकेशन आ गासैबो फरायसालि नि ईन्सपेक्तरफोरनिसिम लाईजाम लिरना हरदों, एईएस ममता होजाई आ जाय फरायसालि नि फोरोंगिरिफोरा गुबुन खामानि जों लोब्बा दं बिसोरनि फारिलायखौ सप्तासे नि गेजेराव मावखुलि आव दैथायहरनो नांगौ होनना बिथोन होदों। मथजाथावदि आगोलावनो फोरोंगिरिफोरा खौरांबिजों बायदिफोरजों सोमोन्दो थानो मोना होनना बुंदोंमोन, नाथाय गोबाङानो थगायनानै खामानि खौ मावगासिनोमोन।

30 जुन नि गेजेरावनो हायार सेकन्दारि नि जोबथा आनजाद नि रिजाल्त खौ फोसावनो हागौ। रिजाल्त खौ फोसावनो थाखाय गासैबो मावनांगौ खामानिफोरखौ मावजोबबाय काउन्सिल आ। गिथावना दैबाना नि थाखायनो रिजाल्त होनाय आ गोबाव जादों होनना खौरां मोनदों। दासिमबो काउन्सिल आ रोखायै खालारखौ फोसावना होआखैब्ला थाबैनो खालार खौ फोसावना होगोन नि खौरां मोनदों। बे खनसे आव 30 जुन नि बारा, बेनि सिगां आव बो जानो हागौ रिजाल्त होनाय आ।

चिरां जिल्ला एबसुनि बानजाइनायाव दिनै काचिकत्रायाव हाथियार दिन्थिनानै धोन लुथिनाय जाथायनि हेंथायै खुद्रिनानै हानजा सुरनाय हाबाफारि लादों । थांनाय 18 जुनआव काचिकत्रायाव पार्मासि होग्रा बिरन बसुमतारीनि नखराव दाखायत जादोंमोन आरो दाखायतफोरा बिथांनि नखरनिफ्राइ गोबां रांजों लोगोसे सना रुफा लानानै थांदोंमोन । मख'जायोदि, चिरां जिल्लायाव बेबादि जाथाया गले गले जाबाय थानाया साफ्रोमबो सुबुंनि गोसोआव गिनाय लाबोदों । बेबादिनो थांनाय 4 जुनआव आमतेखायाव अनिल इश्वारीखौ दाखायटफोरा गावनाय, बिनि सिगांङाव गेजेर कमारपारा गामियाव सिखावफोरा सासे लाइमोनखौ गावथारनानै गालांनायजों लोगोसे, मालबितानि आनान्द आरो आमतेकायाव फिसा बेपारि मावनानै गावनि जिउखौ दैदेनग्राफोरनि नखराव दाखायत जादोंमोन । बेखौनि दिनै सिरां जिल्ला एबसुनि बानजाइनायाव हानजा सुरनाय हाबाफारि लानायनि गेजेरजों सिरांनि जिल्ला बेंगिरिनि गेजेरजों काचिकत्रायाव दाखायत जानाय जाथायखौ गोजौ थाखोनि नायबिजिरनो, दायनिगिरिखौ थाबैनो हमनानै साजा होनाय आरो सरासनस्रा सुबुंनि जिउ आरो धोनखौ रैखाथि होनांगौ मोन्थाम दाबिफोरखौ लानानै आसामनि गिबि मन्त्रि ड० हिमन्त बिस्व शर्मानिसिम गोसोखां बिलाइ गथायो । बे हानजा सुरनाय हाबाफारियावनो बाहागो लानानै मिरु एबसुनि गाहाइ नेहाथारि मानगोनां मुस्रि खनिन्द्र बसुमतारीया दान मोनसेयावनो सिरां जिल्लायाव मोननै जाथाय जानाया जोबोद दुखुनांथाव आरो गोमोथाव होननानै साफ्रोमबो सुबुंनि धोन सम्पटि रैखाथिनि सार्थआव सोरकारा सिखावनि रोदाखौनो बुखुजोबनांगौ होननानै सोरकारखौ नारसिनो । बे हानजा सुरनाय हाबाफारियाव मिरु एबसुजों लोगोसे सिरां जिल्ला बर' थुनलाइ आफाद, ट्राइबेल संघ, बाथौ गौथुम, आसु(AASSU), आख्रासु, आरो बेंगलि फेडारेसननि दैदेनगिरिफोरा बाहागो लायो । खुद्रिनाय हाबाफारियाव 31 नं सिधली समस्टिनि एम.एल.ए. मुस्रि जयन्त बसुमतारीयाबो बाहागो लायो ।

तारगेत आ बर फिसा खौ फेजेननाय नामा, असमिया खौरां बिजों आ बर फिसा नबजित नो भत होनाय नम्बार खौ गोरोन्थि फोसावनाय आ दुखुनांथाव आरो सोंखारिजाथाव। नबजित नो भत होनाय नम्बर आ 9152915246 सो, नाथाय नेशनेल लेभेल नि खौरां बिजों प्रतिदिन ताईम आव बेखौ नंखायै फोसावनाय आ बेसेबां मोजां जादों, गोबां सुबुंफोरा नो बेखौ नायो आरो बेखौ नायनानै जुदि गुबुननो सो भत खौ होदों अब्ला बर फिसा या माबोरै भत मोनबावगोन सानना नाय। प्रतिदिन ताईम आव 9152915240 सो लिरना होदों फन खालामना भत होनाय नाम्बारखौ, नाथाय बेयो नङा, बेबायदि गोरोन्थि नि थाखाय निमाहा बिनो नांगौ चेनेल आ, मखजाथावदि बे गोरोन्थि जानायखौ गिबि आव बर नि मुंदांखा फावखुंगुर फैला जे बरगयारि बिथांखौनो दिन्थिना होनायखौ नुनो मोनदोंमोन ससियेल मिदिया याव, गुबुनफारसे दासिमबो सोरबाफोर नबजित नो भत होआखैब्ला भत होनो हागोन, 23 जुन सिम थागोन भत होनाय आ।