5 July bodo news 2022 ~ Bodoinfo.com

गोजोनथाव खौरां, ईन्तारनेशनेल बक्सार बर फिसा जमुना बर नि देरहादनाय। बुहुमनि मुंदांखा ईन्तारनेशनेल एलर्दा काप आव रुफा नि मेदेल मोननो हादों गेलेगिरि बिथाङा। काजाखास्तान नि राजथावनि सोहोर नुर सुलतान आव जानाय गेलेनाय बादायलायनाय आव 54 केजि नि आव रुफा नि मेदेल मोनदों, फाईनेल सिम मोनहैदोंमोन बिथाङा, नाथाय दुखुनांथाव फाईनेल आव जेनो, थेवब्लाबो रुफा नि मेदेल मोननो हानाय आ बरफोरनि थाखाय जोबोद गोजोनथाव। धेकियाजुलि आव जोनोम मोननाय जमुना बर आ फैगो 2024 मायथाई नि पेरिस अलिम्पिक गेम्स आव गेलेनानै मेदेल मोननो लुबैयो होनना बुङो। मखजाथावदि आईबा वर्ल्द बक्सिं आव ब्रन्ज मेदेल मोनदोंमोन।

गोजोनथाव खौरां नि उनाव मोनसे दुखुनांथाव खौरां, बर नि सासे मुंदांखा फावखुंगुर, फेस्ला फावखुंगुर रामसिं गेरला उरफे बिबिसन ब्रह्म नि जिउ गोमाबाय। खौरां मोननाय बादिब्ला मैया बेलासि नि 6 बाजि सो आव जिउ गोमायो बिथांनि। बिथांङा गोबाव समनिफ्रायनो बेराम आव गोग्लैना दंमोन होनना मिथिना मोनदों, गोबां फेस्ला फाव खालामनानै मोजां मुं मोननाय बिथांनि जिउ गोमानायाव बर सावथुन मुलुग नि थाखाय मोनसे गिदिर खहा जायो। बिथांनि जिउमाया सोरगो आव आलो गोजोनै थानो जायगा मोनथों।

मोनसे गोजोनथाव खौरां, सा 6 बर फिसा या पिदाब्लिउदि नि सिंनि एसिस्तेन्त ईन्जिनियार नि साख्रि नि थाखाय सायखजादों, बे आनजादखौ एपिएससि आ खुंदोंमोन, जोंथ मिथिखायो एपिएससि नि आनजाद आ माबायदि जायो। बेयाव उथ्रिसार जानो हानाय आ जोबोद गोजोनथाव। बेयाव गासै 260 मासि दंमोन, 80 मासि खौ हिनजावसा एबा आयजोफोरनि थाखाय रिजार्भ खालामदोंमोन, मिथिना मोननाय बादिब्ला उथ्रिसार जानो हानाय बर फोरनि मुङा दिगन्त बर, भुपेन बड, देबजित रामशियारि, सयनिका मशाहारि, मृदुश्मिता बर आरो खन्थाय बसुमतारि।

21 बोसोर बैसो नि सिनि चेत्ति आ देरहाबाय मिस ईन्दिया बादायलायनायखौ। 2022 मायथाई नि मिस ईन्दिया जायो कर्नातक नि सिनि चेत्ति आ। 31 बादायगिरिफोरखौ फेजेननानै बेखौ देरहानो हायो। बे हाबाफारि आ मुम्बाई नि जिउ वर्ल्द कनभेन्सन सेन्तार आव जादोंमोन। सिनि चेत्ति आ जेरहानायजों लोगोसे राजस्थान नि रुवल सेखावत आ गिबि रानार्श आप आरो उत्तर प्रदेश नि शिनाता चौहान आ नैथि रानार्श आप जादों। मखजाथावदि सिनि आ एकाउन्तिं आरो फाईनेन्स आव दिग्रि पास खालामनाय। मिस ईन्दिया एन्द वर्ल्द 2020 नि देरहानाय मानसा वारानसि आ खर आव देरहानाय मुकुत खौ गानहोयो।

पिएमकिषान नि रां खौ मोननो लुबैदोंनामा, दासिमबो ई केवाईसि खालामाखैब्ला खालामना लादो थाबैनो, खौरां मोननाय बादिब्ला ई केवाईसि नि सम खौ बारायना होबाय। फैगो 20 जुलाई नि गेजेराव बेखौ खालामनो नांथारगोन, नङाब्ला आबादारि नि रां खौ मोननाय नङा, लोगोसे खौरां मोननाय बदिब्ला बेंक एकाउन्त खौ बो आधार जों लिंक खालामनो होदों।

मनिपुर नने जिला याव जानाय गिथावना हा गिसिखानाय आव आसामनि सुबुंफोरनि जिउ गोमानाय नि अनजिमा या गासै सा 9 जाहैबाय, गुबुनफारसे दासिमबो गोमाना थानाय सुबुंफोरनि अनजिमा या 12 होनना मिथिना मोनदों। आसाम सोरखार आ मनिपुर आव बे जायगायाव थानाय आसामनि सा 26 सुबुंफोरनि फारिलाय दिहुनना होदों, थांनाय 29 जुनखालि जादोंमोन जाथाय आ। बे जाथाय आव गासैखौबो लाफायोब्ला 42 जाबाय। सा 20 आ दासिमबो गोमाना दं। आसाम सोरखार नि गिबि मन्थ्रि नि बिथोन आव मन्थ्रि पियुश हाजरिका या जाथाय जानाय जायगा याव थांनानै खौरां लाहैयो। मैया बिथाङा सा 5 जोखोम जानायफोरखौ एयार एसिया नि बिरखं जों आसाम आव लाना फैयो।

सासे पुलिस कन्सतेबल नि धोन दाबि खालामनाय आ नगांव जों लोगोसे गासै आसाम आव नो सुबुंफोरखौ सोमोनांहोदों। धोनदाबि नि मोनसे अदिअ क्लिप भाईरेल जानाय आ थाना नि सिङाव मा सोलिदों बेखौ दिन्थिदों। सासे दायनिगिरिखौ एसपि नि मुङाव कन्सतेबल आ धोन दाबि खालामनायल नङा गावखौनो बुथारना लानाय फारसे लांनाय बायदि जाखाय जादों। थिसनजानाय गसर खौ गैया खालामनो थाखाय धोन दाबि खालामदोंमोन नगांव ताउन पुलिस नि सासे कन्सतेबल आ। बिनि मुं खौ जनैक लस्कर होनना मिथिना मोनदों। जायगा नि सासे सेंग्रा नि बेरेखा किदनेप आरो जिनाहारि नि अजद ओंखारदोंमोन। बे अजद नि थाखाय नो बेखौ बोखारनो रां दाबि खालामदोंमोन। मोजां मोननायनि सोमोन्दो नि जाथाय मोन बेयो।

फैगासिनो मुस्लिम फोरनि ईदउल आजहा एबा बकरिद। बिसोरनि बे फोरबो आव मोसौ नि बोलि होनो नाङा होनना एआईईउदिएफनि गाहाय बदरुददिन आजमल आ खावलायदों बिसोरनि सुबुंफोरखौ, ईश्लाम धोरोम आव जायखिजाया जिउ गोनां खौ खष्त होयि नि बाथ्रा लिरनाय दं आरो भारत नि गोबां सुबुंफोरा मोसौ खौ गोथार आरो फुजिजाथाव जुनार महरै नायो, बेखायनो मोसौ नि सोलाय गुबुनखौ बोलि होनो नांगौ होनना बो बुंबावो, मोनसे प्रेस रिलिज नि गेजेरजों बो बेखौ बुंदों।