25 July bodo news 2022 ~ Bodoinfo.com

रायजो सोरखार नि मोननैसो थिरांथा फोरखौ लानानै गोजोननाय मोनि खौ फोरमायदों बर थुनलाइ आफाद आ, थांनाय 17 जुलाई आव जानाय केबिनेत नि जथुम आव रायजो सोरखार आ मोननैसो थिरांथाफोर लादोंमोन, बेनिनो मोननैसो थिरांथाफोरखौ गनायना लानो हाया होनना आफादगिरि तरेन बर बिथाङा बुंदों, मैया बितिआर नि सदर सोहोर कक्राझार आव जानाय मिरु मावफुं जथुम आव बाहागो लाखांनायनि उनाव खौरांगिरिफोरनि सिगाङाव बुंदों- आसामनि गोबां जायगा फोराव नो दासिमबो सोरखारि नङि गोबां सोलोंथाय फसंथानफोर दं, दायो सोरखार आ बे समाव आरो फरायसालिफोरखौ सोरखारि खालामनाय जानाय नंलिया होनना बुंदों, लोगोसे मोन 6 हारि नो एसति होनायनि खामानि मावबाय थानाय आ जनजाति फोरनि गोबां खहा खालामगोन होनना बो बुंदों, गुबुनफारसे त्राईल बेल्त एन्द ब्लक नि हा खौ दखल खालामना लानायफोरखौ दासिमबो होखाराखै होनना बुंदों आरो लोगोसे बर फोरनो हानि मोनथाय होआलासै जानला मानला होखारनायखौ दुखु मोननाय फोरमायनायजों लोगोसे बेनि सायाव सोरखार खौ बेबस्था लानो खावलायो।

बदलेन्द जनजाति सुरक्सा मन्स नि जानानै मावफुं आफादगिरि दावराव देख्रेब नार्जारि बिथाङा बो मैया खौरांमेल नि गेजेरजों बर फोरनि गेजेराव मोनसे नि उनाव मोनसे खैफोद फैगासिनो होनना बुंदों, जुदि बे मोन 6 हारि नो एसति होयोब्ला बर फोरा जोबबाय बेयो रोखा जागोन होनना बुङो, जोंनि बर फिसा बर नि आफाद फोरा गोथौयै साननो नांगौ, बिसोर त्राईबेल जायोब्ला एसति नि रिजार्भ थानाय फोरा थांजोबगोन, एमएलए नि मासि आ नो जा, बितिआर, साख्रि नि, फरायनायनि(मेदिकेल, ईन्जिनियारिं) बायदिफोरनि मासि खौ लाजोबगोन, बर फोरा बिसोरनि बादि एदभान्स नङा होनना बो फोरमायो बिथाङा। जों गोबां सम सिगांनिफ्राय नो बेखौ होबथागासिनो मानोना बिसोरहा त्राईबेल मोननायनि क्राईतेरिया गैया होनना बुंदों, जायफोरा बे हा नि नो थागिबि, गुबुन जायगा नि नङा, जायगा सेना थाफैया, गाग्लोबनानै दखल खालामनानै थायाखै बिसोरोसो मोनो, दानि त्राईबेल नागिरनायफोरहा त्राईबेल मोननायनि जेबो मोनथाय आ नो गैया, मरान मतक आ असमिया जाबाय, ति गार्देन फोरनि आ गुबुन जायगा निफ्राय लाबोनाय, कस राजबंसि आ मिक्स हारि, जेबो सिनायथि गैया, कस आ आलादा आरो राजबंसि आ आलादा, सोनाब बंग आव बिसोर एससि सो आरो लोगोसे बे जायगा याव अबिसि जाना दंखायो होनना बो दावराव देख्रेब नार्जारि बिथाङा बुंदों,

मैया ईउनाईतेद त्राईबेल अरगेनाईजेशन आसाम आ बो खौरांमेल नि गेजेरजों बिसोर एसति जायोब्ला आसाम सोरखार नि एसति नि रिजार्भेशन आव 10 जौखोन्दो ल मोनो, बिसोर एसति मोनोब्ला जोंनि बर फोरा सासेबो साख्रि मोननाय नङा होनना बो बुंदों।

गुबुनफारसे बितिआर नि गाहाय प्रमद बर बिथाङा बेयाव साननो गोनां जेबो गैया होनना बुंदों, मानोना सोरनोबा एसति नो मोनथाय होनो होनबा नो होनो हाया, दाननो होनबानो दाननो हाया, बे दाबि खालामनाय आ गोदान नङा, गोबाव सम निफ्राय नो सोलिगासिनो, दिनैसिमबो मावनो हायाखै, संबिजिर आ जायखौ पारमिशन होयो बेखौसो मावनो हायो होनना बुंदों, बेखायनो बिसोर दासिमबो एसति मोनाखै होनना बुंदों, बेखायनो बेफोर खोथा खौ लानानै साननो गोनां गैया होनना रोखा खालामना होदों। गुबुनफारसे बिथाङा हा हु नि जेंना खौ बोस्रांनो नाजागोन होनना बुङो, त्राईबेल बेल्त एन्द ब्लक नि हा नि पात्ता खौ रावबो गुबुननो होनाय जानाय नङा, गिबि मन्थ्रि आ त्राईबेल बेल्त एन्द ब्लक नि हा खौ हो होनना बुङाखै. बेनि खाथि खाला थानाय बेल्त एन्द ब्लक नि हा नङि फोरखौ सो बुंदो होनना फोरमायो। आसाम सोरखार नि बादि नो बितिआर आव बो हा हु नि लेखा खौ दिजिताईज खालामदों होनना बुंदों, चिरां कक्राझार आरो उदालगुरि नि आ जाजोबबाय, बाक्सा नि आ 70 जौखोन्दो जाबाय. हा हु नि लेखा खौ अनलाईन नि गेजेरजों नो मोनगोन होनना फोरमायो बिथाङा।

आसामनि फरायसा फोरनि थाखाय मोनसे गिदिर फोसावनाय, दानिया फरायसा फोरा ईंराजि आव फरायनो नांसिगोन सानखान्थि आरो बिगियान आयदा खौ, बेखौ फोसावना होदों आसामनि सोलोंथाय मन्थ्रि रनुज पेगु बिथाङा, गासैबो रोखोमनि आनजाद फोराव जाहाथे मोजां फिथाय मोनो एबा आनजाद नि थाखाय जाहाथे गावखौ थियारि खालामनो हायो बेनि थाखायनो बे नेम खौ खालामदों होनना फोरमायो, मोन 6 आयदा नि गेजेराव सानखान्थि आरो बिगियान आयदा खौ लानो नांगोन ईंराजि आव, गुबुन आयदा नि आ गावनि बिमानि राव नि नो जागोन।

हादरगिरि महरै दिनै समायखिरा लागोन, हादरनि 15 थि हादरगिरि महरै, मोनसे आदिबासि नखराव जोनोम जानाय आयजो आ भारत नि हादरगिरि जागोन दिनै, हादरगिरि महरै सायखजानाय आयजो बिथाङा मोन 5 रेकर्ड खालामनो हायो गिबि रेकर्दआ बिथाङा हादरगिरि जानाय गिबि आदिबासि आयजो एबा त्राईबेल आयजो, नेथि रेकर्ड आ जाबाय उदांश्रि नि उनाव जोनोम जानाय सुबुं महरै गिबि हादरगिरि जादों, 3थि रेकर्ड आ उन्दैसिन हादरगिरि जानाय, दासिमनि हादरगिरि जानाय बिथाङा नो उन्दैसिन सुबुं, 4 थि आ सानसे समाव काउन्सिल महरै राजखान्थि आव फैनाय सासे सुबुं आ हादरगिरि जानो हादों, 5 थि रेकर्ड आ जाबाय बिथांनि रायजो उरिश्या नि, जाय रायजो नि सुबुंफोरा दासिम संबिजिरारि मासि खौ मोननो हादों। दासिम हादरगिरि नि मासि आव सा 7 खोला भारत नि सुबुंफोरा जिरायनो मोनदों।

अमा बेदरखौ लानानै दावराव। आगोलनि समाव बर फोर एबा त्राईबेल फोरखौ ल अमा जायो होनना बुंनाय खोनानो मोनोमोन, बे अमा जानायनि थाखाय नो जानो हागौ जोंखौ गोबाङानो मुगैयो गाज्रि मोनोमोन, नाथाय बे अमा खौ नो दायो गोबां जायगा याव गुबुन हारि फोरखौ बो जानाय नुनो मोनो, लासै लासै अमा या गुबुन हारिफोरनि बो मोजां मोनजानाय आदार जालांगासिनो, अमा बेदर खौ लानानै नो दावराव जानायनि खौरां। सिबसागर नि युव दल नि साहित्य सभा नि 6 थि मिरु मावफुं जथुम आव होनाय आदार आव अमा बेदर थाफानाय आ दावराव खालामदों, बेलासि नि जानाय आदार आव ओंखाम जों लोगोसे अमा बेदर होफादोंमोन, जथुम आव गुबुन गुबुन जायगा नि गुबुन गुबुन हारि नि सुबुंफोर फैयो, बेबायदि थासारि आव अमा बेदर खौ मानो होखो होनना गोबाङानो सोंदों, ससियेल मिदिया याव दावराव आसाम साहित्य सभा नि जथुम आव अमा बेदर होनाय जाथाय आ।

सोरबा सासे मानसि आ बेबायदि खामानि बो मावनो हायो ना, 31 नं राजालामानि खाथि आव सासे उन्दै गथ खौ बोखांना मोनदों। घग्रापार पुलिस थाना नि सिनि लामा नि दालांनि सिङाव सासे उन्दै गथ नि गाबनाय खोनायो, जायगा नि सुबुंफोरा लोगो लोगो थांनानै नायनाय आव मना याव सासे उन्दै गथ खौ सोना दोननाय हालोद आव मोनो। गथ नि बैसो आ 4 नङाब्ला 5 दान सो जानो हागौ होनना साननाय जादों, सोरबा गाज्रि सुबुं आ मना याव सोना गारना गालांनायनि सन्देह, मना याव गायखेर नि बथल बो गालांदों, उनाव लोगो लोगो देहाफाहामसालि आव लाङो, थारैनो सोमोनांथाव, रायजोफोरा सानदों सोरबा गावनि गाज्रि खामानि मावनायखौ एरसोखोमानो थाखायनो बेबायदि खालामदों होनना।