कक्राझार
जिला नि सालाकाति आव गिथावना लामा नि जाब्रबथाय, मैया बेलासि समाव सालाकाति नि
किनालि सक आव जानाय गिथावना जाब्रबथाय आव सा 4 सुबुंफोरा गाज्रियै जोकोम जादों
होनना मिथिना मोनदों, जोखोम जानायफोरनि मुं खौ गोवालपारा जिला नि दुधनै नि
करलापारा गामि नि महिनि बसुमतारि44, बुधबारि बसुमतारि 49, हुमायुन बसुमतारि 50 आरो
बापन बसुमतारि16 होनना सिनायनाय जादों, अईल तेंकार आरो सेन्त्र गारि जों
सौग्रावलायनाय आव नो जादोंमोन, जोखोम जानायफोरखौ कक्राझार आरएनबि देहाफाहामसालि आव
लांनाय जादोंमोन, उनाव मोजां फाहामथायनि थाखाय बङायगांव आव लांनाय जायो।
सिरां नि बासुगांव आव ईद नि गेजेरावनो दुंहाव थासारि, मोसौ बेदर, कोरबानि होनाय मोसौ नि बिगुर खौ लानानै दुंहाव थासारि, सिरि सिरियै लांखुमादोंमोन, सा 3 खौ हमबाय दायो। सासे सेंग्रा या ई रिक्सा याव बे बेदर आरो बिगुरखौ लांदोंमोन, बेलासि नि 5 बाजि सो आव जादोंमोन जाथाय, मखजाथावदि आसामनि गिबि मन्थ्रि आ मुस्लिम सुबुंफोरखौ ईसे सानै हयै कुरबानि हो होनना खावलायदोंमोन जाहाथे हिन्दु सुबुंफोरनि गोसो आव जेबो रोखोमनि दुखु मोनहोनाय जाया, दायो जाथाय जानाय जायगा याव पुलिसफोरा थांनानै नायबिजिरगासिनो।
ससियेल मिदिया याव हरखाब भाईरेल नागालेन्द नि सासे मन्थ्रि आ। बे मन्थ्रि आ जादों नागालेन्द नि गोजौ सोलोंथाय आरो जनजाति फोरनि मोनसे बिफान नि मन्थ्रि तेमजेन ईमना अलों, दोलो नि मोनसे मेल आव मेगन फिसा नि सायाव मिनिथावना बाथ्रा बुंनानै बयजोंबो मोजां मोनजादों आऱो भाईरेल जागासिनो। बिथाङा बुंदों- गोबां सुबुंफोरानो सा सानजा भारत नि सुबुंफोरनि मेगन खौ फिसा होनना बुङो, जोंनि मेगन आ फिसा, नाथाय मेगन नि नुथाय आ गोरा, बेनि उनाव नो मेगन फिसा नि सुबिदा नि सायाव बुङो- जोंनि मेगन आ फिसा, बेनि थाखाय नो मैला एबा लेथ्रा या खम हाबो मेगन आव आरो लोगोसे माब्लाबा गोलाव हाबाफारि सोलिबाय थायोब्ला बेयाव गोरलैयैनो उन्दुना थानो हायो होनना बो बुंदों। भिदिअ खौ गोबां सुबुंफोरा नो सेयार खालामदों, आसामनि गिबि मन्थ्रि आ बो सेयार खालामदों।
बाक्सा नि मुशलपुर आव मैया नेशनेल फिस फार्मार दे खौ फालियो, रायजो नि गुबुन गुबुन जायगा नि बादि नो बाक्सा याव बो बितिसि नि ना बिफान नि बान्जायनाय आव बेखौ फालियो, बितिआर नि मोन 5 जिला निफ्राय फैनाय ना फिसिग्राफोरनि नुजाथिनाय आव बितिसि ना बिफान नि ईएम राकेश ब्रह्म बिथाङा बिबुंथि लाखियो, ना फिसिनायनि सायाव गोबां बाथ्रा बुङो, खौरां मोननाय बादिब्ला बे हाबाफारि आव नो सा 68 ना फिसिग्रा फोरनो 20 रोजा रां नि रांखान्थियारि मदद होदों, बे हाबाफारि आव गोबां सुबुंफोरा नो बाहागो लादोंमोन।
दखान आव सिखाव खालामनायनि अजद आव सासे 15 बोसोर बैसो नि मिथुन कुमार मुंनि उन्दै गथ खौ बुदोंमोन फरायसा आफाद नि सोद्रोमा फोरा, बेनि उनाव नो बे गथ आ गावखौनो बुथारना लायो, गरेश्वर आव जादों जाथाय आ, बेनि दाय आव अल आसाम फरयसा आफाद नि दैदेनगिरिजों लोगोसे सा 3 खौ हमदों होनना मिथिना मोनदों, लोगोसे दायो देफेलि आन्सलिक फरायसा आफाद नि मावखुलि खौ बो शिल खालामो। मिथिना मोननाय बादिब्ला गोरेश्वर नि नाउकाता नि गंसे दखान आव जादोंमोन सिखाव जादोंमोन, पुलिसफोरा नायबिजिरदोंमोनब्लाबो नागिरना मोनाखैमोन। गुबुनफारसे सनिबारखालि मिथुन कुमार आ आगोलाव सिखाव जानाय जायगा याव खामानि मावनो थांनाय आव आन्सलिक फरायसा आफाद नि गोबां सोद्रोमाफोरा बे गथ खौ सिखाव साजायनानै देहायारि आरो मेलेमारि गाग्लोबो, बेनि उनाव नो लाजिनाय मोननानै गावखौनो बुथारना लायो। पुलिसफोरा नायबिजिरगासिनो।
सानसे सिगाङाव नगांव नि बरमपुर नि बरलालुं आव सासे सुबुं खौ गोथाङैनो सावना होनाय जाथायनि खौरां फोसावदोंमोन, रायजोनाङैनो बे सोमोनांहोनाय बे जाथायनि उनाव नायबिजिरनानै सा 5 खौ हमदों होनना मिथिना मोनदों, सा 3 आयजोफोरजों लोगोसे गासै सा 5 खौ हमदों, मखजाथावदि सासे आयजो खौ बुथारनायखौ लानानै गामि नि रायजोफोरा मेल खुंनानै रन्जित बरदलै मुंनि सुबुंखौ गोथाङैनो सावना होदोंमोन, बेनि उनाव नो नायबिजिरनाय आ सोलिगासिनोमोन।
दुलाराय बाथौ गौथुम आ सत्यरन्जन बरा खौ एसति फोरमानलायखौ मोननो नाङा होनना बुंनो होआखै, बेयो बिथांनो गोसोजों बुंनाय सो, बेखौ मैया खौरांगिरिफोरनि सिगाङाव बुंदों गनेश दैमारि बिथाङा। बर फोरनि गेजेराव बे बाथ्रा खौ नो लानानै गोरोन्थि सानलायनाय फैदों, दिनैनिफ्राय बेबायदि गोरोन्थि सानलायनाय आ फैनो नाङा, दुलाराय बाथौ गौथुम आ माब्लाबाबो बेबायदि बुङाखै आरो इयुन आव बो बुङा, दुलाराय बाथौ गौथुम आ बाथौ धोरोमनि थाखाय खामानि मावबोबाय थादों, बेफोरखौ लानानै दान्थे बिदान्थे खालामनो नाङा, लोगोसे बिथाङा गासैखौबो खावलायदों जों जयै खौसेयै थायोब्ला सो गेरेमसा हारि दानो हागोन होनना बो बुंबावो। गुबुनफारसे बाथौ धोरोम आ जोबस्रांलानो नागिरदोंनामा जेरैबादि मिसनारि फोरा साग्लोबसारदों होनना सोंनायनि फिननाय महरै बिथाङा बुंदों- जोंनि बर नि गुबै धोरोम होनना बुङोब्ला बाथौ धोरोम, जायफोरा मिसनारि आव थांदों बिसोरबो बाथौ धोरोमनि नो मानसि मोन, नाथाय बर नि गुबै धोरोम बाथौ खौ नागारनानै मिसनारि आव गोग्गोमै खामानि मावदों बेबायदिनो जुदि नोंथांमोना बाथौ नि थाखाय खामानि मावनायमोनब्ला बाथौ आ बुहुम आव बर हारि नि थाखाय बाथौ धोरोम आ गेवलांसार जागौमोन होनना बुङो। बर माहारि नि थाखाय बाथौ धोरोमखौ फोथांना लाखिनाय नि गोनांथि दं, बाथौ धोरोमनि थाखाय सो दिनै राव थुनलाय आसार खान्थि, खाम सिफुं खौ नो बुङा मानो खेराय बे गासैबो नि थाखाय सो थांनानै दं होनना बो बुङो। गुबुनफारसे हिन्दुत्वबादि दैदेनगिरि सत्यरन्जन बरा नि बेरेखा कक्राझार सानजा बियाब नि एमएलए लरेन्स ईश्लारि बिथांनि खौरांमेल खुंदोंमोन। सत्यरन्जन बरा नि बेरेखा बेबस्था लानो खावलायदों बिथाङा। बर फोरखौ लानानै गाज्रि राजखान्थि खालामनो नाङा होनना खावलायो। सत्यरन्जन बरा या बर ख्रिस्तियान नि एसति मोनथाय खौ बोखारनो खौरांमेल नि गेजेरजों बुंदोंमोन। खौरां मेल नि गेजेरजों मुस्लिमफोरनि बेरेखा बुंनाय, जुनारसालि नि जिब जुनार नि आदारखौ लानानै बुंनाय, सम सम मुगैथाव बाथ्रा बुंनाय, गावस्रालायनाय लाबोनो नाजानाय बायदिफोर खालामनायनि थाखायनो बेबस्था लानो खावलायो सोरखार खौ. बिथाङा बुंदों- सत्यरन्जन आ मिथिनो नांगौ दि एसति आ हारि नि फोरमान सो, धोरोमनि नङा होनना बुंदों।
मोनसे दुखुनांथाव खौरां। 2021 मायथाइ नि आसाम गौरब बान्था मोननाय कल्पना बर बिथांनि जिउ गोमाबाय। दिनै फुंनि 4 बाजि सो आव उदालगुरि नि रौता नि गावनि न आव जोबथा हां बोयो। गोबाव सम निफ्रायनो केन्सार बेराम जों गाग्लोबजाना दंमोन, फाहामथाय लागासिनोमोन, बितिआर नि गाहाय प्रमद बर, आसामनि गिबि मन्थ्रि बिथांमोनजों लोगोसे गोबां सुबुंफोरा दुखु मोननाय फोरमायदों। कल्पना बर बिथाङा सासे अंगनबारि नि मावथि महरै उन्दै गथ फोरनि थाखाय मोजां खामानि मावनाय नुनो मोनदोंमोन, गथफोरनि जौगाखांनाय आव गोनां खामानि फोर मावदोंमोन, बेनि थाखायनो बे बान्था खौ होदोंमोन बिथांनो। बितिआर नि गाहाय प्रमद बर बिथाङा लिरदों- उदालगुरि जिल्लानि बालिसिहा गामिनि अंगनवाडि आव खामानि मावग्रा मुस्रिमा कल्पना बर' बिथांनि हरखाबै रुंसारि जानायाव आं दुखु फोरमायो, जाय बिथाङा समाजाव होनाय गावनि बिहोमानि थाखाय आसाम सोरखारनिफ्राय 2022 मायथाइनि थाखाय असम गौरभ बान्थाखौ मोन्नो हादोंमोन। जिउ गोमालांनाय न'खरनि सोद्रोमा बिथांमोन्निसिम दुखु फोरमायो आरो गोमालांनाय जिउमानि थाखाय आरज गाबहरो।
bodoinfo.com provides informations regarding State Government, Central Government and Private sector jobs for the aspirants of assam.
Please do not enter any spam link in the comment box. ConversionConversion EmoticonEmoticon