बर फोरनि गेजेराव धोरोमारि गावस्रालायनाय लाबोनो नाजादों नामा, धोरोमारि गावस्रालायनाय जागोन नामा। सासे सुबुं नि धोरोमारि बाथ्रा बुंनाय नि सायाव बर थुनलाइ आफाद नि खौरां बिबुंसार। बर थुनलाइ आफाद आ लिरदों- थांनाय 5 जुलाई मंगलबारखालि दुलाराय बाथौ महासभा नि गाहाय नेहाथारि आरो गुबुन माखासे बिबानगिरिफोरा आरएसएस जों जथाय खौरां बिबुंसार होनानै ख्रीस्तान धोरोम आजावनाय बरफोरनि एसति थामहिनबा त्राईबेल हारि नि मोनथायखौ बोखारनांगौ होननानै बुंनाय बाथ्रा खौ बर थुनलाइ आफाद नि नोजोराव गोग्लैदों, बेयो गनायजाथाव बाथ्रा जानो हाया, बेबादि बाथ्रा एबा अजदफोरा हारिनि गावस्रानाय लाबोयो, बेबायदि बिबुंथि निफ्राय जानगाराव थानो थाखाय बर थुनलाइ आफाद आ बाथौ महासभा नि गाहाय नेहाथारि बिथांखौ खावलायो। एपिसिसि नि नेहाथारि गर्जन मुसाहारि बिथाङा बो खौरांमेल नि गेजेरजों बेबायदि जानो नाङा होनना बुङो. मिथिना मोननाय बादिब्ला हिन्दुत्वबादि दैदेनगिरि सत्यरन्जन बराया खौरांमेल नि गेजेरजों ख्रीस्तियानफोरखौ एसति नि मोनथाय निफ्राय बोखारनांगौ, बिसोरनि धोरोम आ गुबुन हादर नि सो धोरोम आरो लोगोसे खाम सिफुं फोरा बिसोरनि नङा होनना बो बुंदोंमोन, बेनि सायावनो गर्जन मोसाहारि बिथाङा गोख्रों बिबुंथि होदों। बर हारि खौ धोरोमखौ लानानै गावस्राहोनो नाजादों होनना बुङो।
ससियेल मिदिया खौ गाज्रियै बाहायनायनि अनजिमा या बारायलांगासिनो नामा। सानफ्रोमबो नंखाय फेसबुक एकाउन्त नि गेजेरजों गोबां सुबुंफोरखौ थगायगासिनो। साधारन सुबुंफोरा थ गोजान नि बाथ्रा, बेबायदि थगायजानायनि जे आव जिला बेंगिरि आ बो बारगआसै। मरिगांव जिला बेंगिरि नि मुङाव नंखाय ह्वात्स एकाउन्त खुलिनाय आ सोमोनांहोदों साधारन सुबुंफोरखौ, जिला बेंगिरि रन्जन घरफलिय नि मुङाव सोरबा गाज्रि सुबुङा ह्वात्सएप एकाउन्त खुलिनानै गोबां सुबुंफोरनो मेसेज हरनायनि खौरां सोराङाव फैदों। जिला बेंगिरि नि मावखुलि नि मावथिफोरनियाव मेसेज हरदोंमोन, बेनि सायाव दायो मोनसे गसर थिसननाय जाबाय होनना खौरां मोनदों, मखजाथावदि साननैसो सिगाङाव आसामनि दिजिपि नि मुङाव बो सोरबा गाज्रि सुबुं आ नंखाय एकाउन्त खुलिनायनि खौरां मोनदोंमोन, बेफोरबायदि नो गोबां सुबुंफोरा गाज्रि खामानि मावो, नाथाय बेबायदि खालामनानै मा लाब जायो, हमजायोब्ला मा जागोन बेखौ साननो रोङा, हमनाय आ थ जेबो गोरा नङा।
Please do not enter any spam link in the comment box. ConversionConversion EmoticonEmoticon