1 September bodo evening news. ~ Bodoinfo.com

दावदै नि थाखाय नो बरपेता नि हाउलि आव गिदिर बुलायनाय जाथाय। हाउलि नि कालझार गामि नि 2नं अंगनबारि मिरु आव दैसे रुनाय दावदै खौ लानानै नांलायनाय जादोंमोन आरो बेयो उनाव बुलायनाय आव महर लाय़ो। हाउलि नि कालझार गामि नि 2 नं अंगनबारि मिरु आव गथ फोरनि गेजेराव रानना होदोंमोन रुनाय दावदै, बे समाव नो मिरु आव थांनानै हाफिजु खान आरो बिनि बिसि सान भानु खातुन आ मिरु नि मावथि नि सिगाङाव बिसोरनि न आव थानाय गथ नो बो दावदै खौ होनो दाबि खालामो, नाथाय उनाव मिरु आव नुजाथियि गथ नि मुङाव दावदै होनाय जानाय नङा होनना बुंनायनि उनाव नो बिसि फिसाय आ दुंहाव थासारि सोमजिहोयो। सानैबो अंगनबारि नि मावथि साहातन आहमेद खौ देहायारि गाग्लोबदों बो होनना मिथिना मोनदों, गुबुनफारसे दावदै दैसे नि थाखाय दावराव जानाय आ रायजोफोरखौ मिनिहोदोंबो।

बुधबार खालि सिरां आव नुजाथिनानै कक्राझार नि लोकसभा बियाब नि एमपि नब कुमार शरनिया बिथाङा खौरांगिरिफोरनि सिगाङाव कोसबिहार ईउ ति आ माब्लाबाबो जाया होनना बुंदों, बिजेपि आ अनन्त महाराज खौ राजखान्थि नि स्वार्थ आव बाहायदों होनना फोरमायो, मानोना बे ओनसोल आव आक्रासु आ लोरबां जादों, आक्रासु आ गोबां बाहागो आव गावस्रानाय आव संगथन नि बोलो आ गैया जालांदों, बेखायनो गोदान राजखान्थि दैदेनगिरि नांगौ बिजेपि नो। रायजो फोरजों सावरायालासै माबोरै इउति होनो हागोन सोङो एमपि बिथाङा। मखजाथावदि सोनाब आसाम नि मोनसे गिदिर बाहागो आरो सोनाब बंग नि सानजा नि बाहागो नि 7 रायजो खौ लाफानानै कोसबिहार ईउति दागोन होनना बुंदोंमोन अनन्त महाराज आ। लोकसभा बिसायखथि नि सिगां नो बेखौ जाफुंहोगोन होनना बुंदों, मा जायो बेखौ उनाव सो मिथिसिगोन।

बिजेपि आरो इउपिपिएल नि सोरखार आ बितिआर आव दं, बेबायदि नो आसाम आव बो बे सोरखार आ दं इउपिपिएल बिजेपि नि नो। नाथाय बितिआर आव समान मोनथाय मोनदों ना बिजेपि आ। बुधबारखालि सिरां नि धालिगांव आव काजलगांव मन्दल कमिति बिजेपि आ खौरांमेल नि गेजेरजों गोबां सोंलु सोंदों। इउपिपिएल आ लोगो नि धोरोम खौ फालियै नि अजद, सिरां जिला याव मोनसेबो बाहागो आव नो इउपिपिएल दोलो आ रैखा खालामाखै लोगो नि धोरोमखौ, मिरु नि थाखो आव बिजेपि इउपिपिएल नि लोगो आ सोलिगासिनो। काजलगांव निफ्राय बिजेपि नि मदद आव रोनगोरा नार्जारि बिथाङा राज्यसभा नि एमपि जाबाय, दायो मिरु आरो रायजोआरि थाखो आव ल सो लोगो आ मोजां जाना दं। लोगो जानायनि थाखाय बितिआर आव बिजेपि नि बो बाहागो थानो नांगौमोन, नाथाय बेयाव बेबायदियै सोलियाखै, बिजेपि आ बाहागोआरि जानाय नि दाबि खालामदों। सिरां आव दानाय ति सि एल सि सि आव बिजेपि आ आफादगिरि आरो लेङाय आफादगिरि एबा सोद्रोमा बो मोनाखै नि अजद बिजेपि नि, बेबायदि नो भिसिदिसि आरो मिउनिसिपाल बर्द आव बो बिजेपि आ नायजायाखै, बांगालदोबा भिसिदिसि आव सासे भिसिदिसि नि सोद्रोमा बिजेपि निफ्राय होनाय जादोंमोनब्लाबो बेखौबो दानखनाय नि अजद खौरांमेल आव, बिजेपि आ गावनि मोनथाय खौ बिनानै इउपिपिएल ब्लक, जिला आरो मिरु कमिति जों जगाजग खालामदोंब्लाबो जेबो गोसो होजायाखै होनना बो बुङो।

गोनांथार मुवा बेसाद नि बेसेन आ बारा जालांगासिनो थानाय समाव नो साधारन सुबुंफोरनि थाखाय मोनसे मोजां खौरां, खम जाबाय कमारसियेल एबा फालांगियारि सिलिन्दार नि बेसेन आ। 100 रां खम खालामदों होनना खौरां मोनदों। दिनैनिफ्राय बे बेसेन खौ थि खालामना होदों। नाथाय न आव बाहायनाय 14.2 केजि सिलिन्दार नि बेसेन आ एखे आ नो दं। 19 केजि नि सिलिन्दार नि बेसेन आ दिल्लि आव 91 रां 50 फैसो, कलकाता याव 100 रां आरो मुम्बाइ आव 92 रां 50 फैसो खम जादों।