दिनै केबिनेत
नि जथुम आ बितिआर नि कक्राझार आव मोजाङै मोजां जानानै थाङो। आसामनि गिबि मन्थ्रि आ
दिनै कक्राझार आव फैनानै बदफा उपेन्द्र नाथ ब्रह्म नि जोनोम सान 31 मार्च खौ
रायजोनाङैनो फरायसा सान महरै फालिनाय जागोन होनना फोसावो, बदफा नि मांखरसालि आव
थांनानै बिबार बावनानै बेखौ फोसावना होयो। लोगोसे बेखौ मोजाङै बानायनो थाखाय गासै
10 कौति रां होनाय जागोन होनना बो बुङो, बेनिनो 8 कौति आ आसाम सोरखार नि आरो 2
कौति आ बितिसि सोरखार नि, बदफा नि जोनोम सान खौ फरायसा सान महरै फोसावना होनाय खौ
बरायजों केबिनेत नि मन्थ्रि ईउ जि ब्रह्म बिथाङा, बिथाङा नाथाय जोनोम सान नि मुङाव
फरायसालि बन्ध जानो नाङा होनना बुङो, बदफा या गावनो बन्ध नि बेरेखा खालामदोंमोन।
मिरु एबसु आ बो बेखौ फोसावना होनाय आव गोजोननाय मोननाय खौ फोरमायदों।
जेहादि नि
बेरेखा ओंखारबोदों रायजोफोरा, गवालपारा नि पाखिउरा नि रायजोफोरा लोगो जानानै
जेहादि नि न खौ सिफायबाय। रायजो आव दासिम गोबां जेहादि फोर हमदों, माद्रासाफोराव
जेहादि खामानि जों सोमोन्दो थानाय जों लोगोसे गुबुन गुबुन जायगा फोरनिफ्राय बो
हमनाय़नि खौरां खौ मोनबायनो थायो। खौरां मोननाय बादिब्ला दारगार आलगा माद्रासा नि
खाथि आव नो थानाय न आल सा 5 जेहादि थादोंमोन, दायनिगिरि जामालुददिन आ बानायदोंमोन
न खौ, बे न आव नो थादोंमोन सोनाब बंग नि दायनिगिरि ईमाम आब्बास आलि आ बो, माद्रासा
याव थानानै नो फोरोंबोबाय थादोंमोन।
नंखाय सना आऱो
नंखाय रां नि फालांगि जों सोमोन्दो थानाय सासे आयजो जों लोगोसे सा 3 सेंग्राफोर नि
दोलो खौ हमदों पुलिसफोरा। पुलिसफोराहमनाय सा 4 नि मुङा सादिकुल ईश्लाम, मफिकुल
ईश्लाम, आईजुल रहमान आरो रिमा बैश्य। नगांव पुलिस आ खौरां मोननाय नि सायाव
नायबिजिरनै गुवाहाति नि भेतापारा निप्राय हमो बिसोरखौ, हातिगांव पुलिस आ मदद
होदोंमोन बिथांमोनखौ, हर आव नागिरनाय समाव बिसोरनिफ्राय 20 लाख नंखाय 500 रां नि
मोनसे कार्तुन. गंसे नंखाय रां बानायनाय मेसिन, नंखाय सना, मोनसे प्रिनतार जों लोगोसे
सन्देह गोनां मुवा बेसादफोर मोनदों।
गावनि नो
फरायसालि नि सा 6 फरायसुलि फोरजों देहायारि सोमोन्दो खालामनायनि अजद नि उनाव
खारखुमाना थानाय गाहाय फोरोंगिरि प्रदिप सांमाइ खौ हमबाय, कार्बिआंलं नि बैथालांश
निफ्राय प्रदिप सांमाइ खौ हमदों, बियो बिस्वनाथ नि सेलाइकाथि नि हलि साइल्द ईंलिस
फरायसालि नि गाहाय फोरोंगिरि मोन, फरायसालि नि हस्तेल आव थांनानै बेबायदि
लाजिनांथाव जाथाय खौ खालामदोंमोन। फरायसुलिफोरा उनाव गावनि जोथोनलागिरि नि सिगाङाव
बुंना लानायनि उनाव नो थासारि आ दुंहाव जादोंमोन, बेखौ मिथिनानै नो खारखुमाना
दंमोन, दायो पुलिसफोरा हमनो हाबाय।
भारत नि बारग क्रिकेतार
सुरेस रायना नि गिदिर थिरांथा, क्रिकेत नि गासैबो फर्मेत निफ्राय आजिरा लाबाय
बिथाङा, दिनै बिथाङा बेखौ त्वितार नि गेजेरजों फोसावना होयो, बिथाङा गावनि हादोर
आरो रायजो उत्तर प्रदेश नि जानानै गेलेनो मोननाय खौ मोनसे सनमान नि बाथ्रा होनना
फोरमायो। मखजाथावदि बिथाङा आगोलावनो भारत नि गेलेनायनिफ्राय आजिरा लाखादोंमोन, नाथाय
आईपिएल खौ गेलेबोगासिनोमोन, नाथाय बे बोसोर नि आइपिएल आव बिथाङा गेलेनो खाबु
मोनासै, रावबो दोलो आ नो बायाखैमोन बिथांखौ।
bodoinfo.com provides informations regarding State Government, Central Government and Private sector jobs for the aspirants of assam.
Please do not enter any spam link in the comment box. ConversionConversion EmoticonEmoticon