रेहाय मोनासै, एनदिएफबि नि गायसनगिबि आफादगिरि रन्जन दैमारि बिथाङा जेल निफ्राय उदां जायासै, मोनसे दुखुनांथाव खौरां, गोजोन गोरोबथा नि सागानगिरि जानायनि उनाव बो दासिमबो जेल आव नो थानांदों, आरो दानि राय नि बादिब्ला जिउ जोबजासिम नि जेल आ नो थाफिनबाय, आगोलाव जाय राय खौ होदोंमोन बे राय आ नो थाफिनबाय। दिनै गौहाति गोजौ बिजिरसालि आ बे राय खौ होयो, 2008 मायथाइ नि 30 अक्तोबर नि बेरफ्रुहोनाय जाथाय नि गुबै दायनिगिरि साजायदोंमोन, मिथिना मोननाय बादिब्ला दिनैनि राय आव सा 4 खौ दाय निफ्राय उदां खालामबाय, रन्जन दैमारि बिथांजों लोगोसे गासै सा 10 नि खौ आगोलाव होनाय राय, जिउ जोबजासिम साजा खौ नो दोनफिनबाय। मखजाथावदि जिउ जोबजासिम जेल नि साजा खौ सिबिआई बिजिरसालि आ होदोंमोन, बेनि बेरेखा नो दायनिगिरि खालामजानाय बिथांमोना गोजौ बिजिरसालि नि खाथि आव थांदोंमोन, मिथिना मोननाय बादिब्ला उदां जानाय फोरनि मुं खौ अनसाइ बर, लखरा बसुमतारि, ईन्द्र ब्रह्म आरो जयन्ति ब्रह्म होनना मिथिना मोनदों, गुबुनफारसे रन्जन दैमारि, अजय बसुमतारि, राजु सरकार, खर्गेश्वर बसुमतारि, जर्ज बर, राजेन गयारि आरो बैसागि बसुमतारि बिथांमोननि साजा या एखे आ नो थाफिननाय नि खौरां मोनदों।
दिनैनि बे राय
नि सायाव बितिआर नि गाहाय प्रमद बर बिथाङा दुखु मोननाय खौ फोरमायो, मोनसे मोजां
फिथाय मोनगोन खौ आसा खालामदोंमोन, जों फिन खनसेबाव भारत सोरखार आरो आसाम सोरखार
जों सावरायगोन होनना फोरमायदों, सान्ति सुक्ति जों थाफानाय बादियै माबायदि गावनि खामानि
मावहोनो हायो बेनि सायाव सावरायलायनाय जागोन, जुदिसियारि आ रावनिबो सिङाव नङा होनना,
गाव गावनि जायगा याव दं होनना फोरमायो, बेनि गेजेरावनो माबोरै मा खालामनो हायो
नाजागोन खौ फोरमायो।, ईएम रन्जित बसुमतारि बिथाङा बो दुखु मोननाय खौ फोरमायदों,
जों माब्लाबाबो जेना, गुबुन मोनसे लामा जों आयेन नि सिङाव नो थानानै उदां खालामनो
नाजागोन होनना बुंङो।
Please do not enter any spam link in the comment box. ConversionConversion EmoticonEmoticon