29 September bodo news 2022 ~ Bodoinfo.com

मैया एनदिएफबि नि गायसनगिबि आफादगिरि रन्जन दैमारि बिथांनि उदां नि दाबि आव आसाम बन्द फोसावदोंमोन बारग एनदिएफबि फोरा, गोजौ बिजिरसालि आ आगोलनि राय खौ नो दोनफिननाय नि उनाव नो गोबां सुबुंफोरा दुखु मोननाय खौ फोरमायदोंमोन, मैया फुंनिफ्राय होनाय बन्ध आव बितिआर आव नो बांसिन गोहोम गोग्लैनाय खौ नुनो मोनदों, बितिआर नि जिल्ला फोराव गोबां जायगा याव नो फालांगियारि फसंथान फोरा बन्ध जादोंमोन होनना मिथिना मोनदों। एमसिएलए फ्रेस मोसाहारि बिथाङा बिथांखौ उदां खालामि नि सिङाव बितिआर आव माबा नङा माबा मोनसे जाहोन थानो हागौ, ससियेल मिदिया नि गेजेरजों दुखु मोननाय फोरमायदों, नाथाय सम आव खामानि मावनो हायाखै, सम बांरलांनानै दुखु मोननाय फोरमायब्ला थ जानाय नङा, आगोलाव रन्जन दैमारि बिथांखौ उदां खालामनो थाखाय खामानि मावगासिनो होनना बुंदोंमोन, नाथाय, खामानि मावदोंब्ला उदां सो जानो नांगौमोन, दायो मा जाखो, मा खामानि मावखो होनना बो सोङो. गुबुनफारसे बितिआर नि लेङाय गाहाय गोबिन्द बसुमतारि बिथाङा रन्जन दैमारि बिथांनि राय नि सायाव मोजां राय खौ आसा खालामदोंमोन होनना बुंदों, नाथाय मोनासै, थेवब्लाबो लामा या जोबना थाङाखै, बेनि सायाव फैगो समाव साननानै खामानि मावगोन, सुप्रिम कोर्त सिम लांनायनि सोमोन्दै बो बुङो, गुबुनफारसे मैया होनाय बन्ध नि सायाव बो बुंदों, जायफोरा बन्ध होदों बिथांमोना आयेन खौ सनमान होनो रोङा होनना बुंङो, जुदिसियेल नि बोलो आ नों आं नि राजखान्थिगिरि नि बोलो बायदि नङा, गोसोब्ला नो आखाय फिदिंनो हानाय बादि नङा, बेफोरखौ जायफोरा बुजियाखै बिसोरसो होदों होनना अजद।

पृथ्विराज नारायन देब मेश बिथाङा बितिआर सुक्ति खौ सन्मान खालामनानै रन्जन दैमारि बिथांखौ उदां खालामनो नांगौ होनना दाबि खालामदों, आगोलाव मा जादों बेफोरखौ बावगारनानै दायो शांति शुक्ति खौ नो खालामखाबाय जेब्ला गारनाय लानाय नि गेजेरजों हगारनो नांगौ होनना बुंदों, बिसि फिसाय नि गेजेरजों बो नांलायनाय जायो, नाथाय उनाव गोरोबलायो, गोरोबलायाब्ला दिभर्स सो जागोन, बेबायदि नो बिथांखौ बो हगारना होनो नांगौ होनना बुङो।बिक्रम दैमारि बिथाङा बो बुंदों रन्जन दैमारि बिथांखौ हगारनांगौ होननानै, बिथांनि साजा मोननाय आ बर फिसा फोरा सहायनो हायाखै, बितिआर गोरोबथा याव मानो रन्जन दैमारि बिथांनि गासैबो गोरोन्थि, दाय, केस फोरखौ गोरोबथा नि गेजेरजों निमाहा होनाय जाथों होनना मानो लिरनो हायासै, मानो बे फंसे बाथ्रा खौ सोसननो हायासै होनना सोंदों।

मैया ईउबिपिअ एबा ईउनाइतेद बद पिपल्स अरगेनाइजेशन आ बो बिथांनि सायाव होनाय राय नि सायाव दुखु मोननाय खौ फोरमायदों, सोरखार खौ बे आयदा नि सायाव सावरायफिननो आरो हगारनायनि राहा लानो खावलायदों बिथांमोना।

आसाम पुलिस नि जाख्लनाय होबथाग्रा बिफान आ घोस लानाय सुबुंफोरनि बेरेखा अपारेशन खालामगासिनो, मैया सानसे आव नो सा 3 सोरखारि साख्रि मावनाय सुबुंफोरखौ हमदों होनना मिथिना मोनदों, मैया आसाम पुलिस नि सो एएसआई सासे हमजादों, अम्बिक कुमार नाथ खौ हमदों, बियो लाहरिघात पुलिस आउतपस्त नि, सासे दायनिगिरिखौ हगारना होनायनि मुं आव रां लादोंमोन, बेनि सिगां बो रां जानायनि दाय आव आरो गुबुन सानै खौ हमदोंमोन, सानै नि मुं आ उत्पल कुमार नाथ आरो मियासान्द आलि, बेनिनो उत्पल आ हायलाकान्दि आरो काछार जिल्ला नि सेलममेन्त अफिसारनि मावखुलि नि मावथि, मियासान्द आ आसाम पुलिस हेदकुवार्तार नि नायक ईउबि नि, अजद नि पेन्दिं बिल खौ पास खालामनायनि मुं आव रां बिदोंमोन, दायो हमजाबाय, फुजा नि सिगां थाय 2 सो रां खामायनायनि थांखि मोन जानो हागौ, दायो सानसे आव नो सा 3 खौ हमनो हादों।

मोजां खौरां, बुरलुंबुथुर दैमा नि सायाव बानायनाय जागोन आरो गंसे दालां, मिथिना मोननाय बादिब्ला बे दालां खौ सरायघात नि खाथि आव नो बानायनाय जागोन, मैया बेनि सायाव मिरु नि मन्थ्रि नितिन गादकारि बिथाङा फोसावना होदों, बे दालां आ रेल आरो गारि मथर मोननैबो नि थाखाय जागोन, बेनि थाखाय 996 कौति 75 लाख रां नि गनायथि होदों, नितिन गादकारि बिथाङा मिथिहोनाय बादिब्ला बेखौ गाहाय मन्थ्रि नि गतिशक्ति मिसन नि सिङाव नो बानायनाय जागोन, दालां आ गुवाहाति नि साहा फारसे नि खौ खोला फारसे जों दाजाबगोन।

मिरु सोरखार आ होनाय फ्रि मायरं खौ आरो दान 3 मोनबावगोन, गुजरात नि बिधानसभा बिसायखथि फैगासिनो, बेनि सिगां गोरिब नखर नि सुबुंफोरनो फ्रि मायरं होनाय नि सम खौ बारायदों, हादर नि 80 कौति गोरिब नखर फोरनो 5 केजि यै फ्रि मायरं होबोगासिनो मिरु सोरखार आ, बेनि बिथांखि आ 30 सेप्तेम्बर आव जोबनो गोनांमोन, नाथाय दायो फिन खनसेबाव 3 दान बारायना होबावबाय, 31 दिसेम्बर सिम फ्रि मोनगोन, बेनि सोमोन्दै फोसावना होयो मन्थ्रि अनुराग थाकुर बिथाङा, मखजाथावदि भारत नि गाहाय मन्थ्रि बिथाङा बुहुमनाङैनो गिथावना थासारि सोमजिहोनाय कभिद नि समाव 2020 मायथाइ नि एप्रिल दान आव बेखौ फ्रि मायरं होनायखौ जागायदोंमोन, 5 केजि यै होनाय जायोमोन, मन्थ्रि बिथाङा बुंनाय बादिब्ला सोरखार आ बे बिथांखि नि थाखाय 3.85 लाख कौति रां खरसा खालामदों, आरो 3 दान बारायबावनाय आव 44,762 कौति रां खरसा जागोन होनना बो बुङो।

सोरखारि साख्रि मावनाय फोरनि थाखाय मोजां खौरां, मैया केबिनेत नि जथुम आव मिरु सोरखार नि मावथि आरो पेन्सनार फोरनि थाखाय DA एबा दियारनेश भात्ता खौ बारायनायनि प्रस्ताब आव गनायथि होयो, हादर आव मिरु सोरखार नि 50 लाख फ्राम मावथि आरो 61 लाख नि बारा पेन्सनार फोरा दायो बे सुबिदा नि बाहागो जागोन, मन्थ्रि अनुराग थाकुर बिथाङा बुंदोः मिरु सोरखार नि मावथि आरो पेन्सनार फोरा गोबां बिबांनि दियारनेस एलावेन्स आरो दियारनेश रिलिफ नि बिगोमा जागोन, जायखौ 2022 मायथाइ नि 1 जुलाइ निफ्राय लानाय जागोन।

बोखावजायै दरं जिला बर' थुनलाइ आफादनि बारग' आफादगिरि (1982), लाइलांफारा गोजौ फरायसालिनि गायसनगिबि आफादगिरि, लाइलांफारा गेजेर फरायसालिनि गायसनिबि गाहाइ फोरोंगिरि , दन्द सहरीया गेजेर फरायसालिनि गायसनगिबि गाहाइ फोरोंगिरि, दलगाव गोजौ फरायसालि, बर' बाजार गोजौ फरायसालि बायदि गोबां फरायसालिफोराव फोरोंगिरि हिसाबै खामानि मावबोनाय आरो रौता ओनसोलनि मैखोम समाज फोसाबगिरि, बाथौ दोहोरोम फोसाबनायाव बिहोमा होनाय अदालगुरि जिलानि आवथायाव थानाय रौतानि 2 नं जाहारगामिनि महेस्वर बर' ( 93) बिथाङा थांनाय 27 सेप्तेम्बर, 2022 अक्ट'आव हरनि 11:45 रिंगायाव रुंसारि जायो । बिथांनि रुंसारि जानाय खौरांखौ मिथिनाय लोगो लोगोनो दुलाराय बर' फरायसा आफादनि मानिनां आफादगिरि मुस्री दिपेन बर' बिथाङा रुंसारिनि न'खराव थांनानै खौरां लाहैयो आरो गोथौ दुखु फोरमायनायजों लोगोसे गोथै सोलेराव बिबार आरो आर'नाइजों मान बाउनाय जायो आरो बिथांनि सोर्गोआरि गोजोन जिउमानि थाखाय ग'साइनियाव आर'ज गाबो । लोगोसे रुंसारिनि न'खर बाय बाहागिफोरजों दुखुनि समाव बाहागो लाफायो।

ईन्दियान आयदल मेथाय रोजाबनाय रियेलिति श नि 13 थि सिजन आव बयकत खालामनायनि त्रेन्द सोलिगासिनो दं गोबां सुबुंफोरा नो बयकत खालामनो दाबि, जाथाय नि सोमोन्दै मिथियो ना नोंथाङा, ईदियान आयदल नि दानि सिजन नि जाद्ज एबा बिजिरगिरि नि मासि आव हिमेश रेशमिया, नेहा कक्कर आरो बिशाल दादलानि दं, श आ जागायनायनि 3 सप्ता सो सिगां आव नो सा 15 तप बादायारिफोरखौ सायखनाय जादोंमोन, नाथाय ससियेल मिदिया याव सासे बाहागो लानाय खौ सायखयि नि थाखाय नो रायजोफोरा रागा जोंनायखौ फोरमायदों, रितो रिबा मुंनि मेथाय रोजाबगिरि आ मोजां रोजाबनानै बो सायखजायासै, अदिशन नि समनिफ्राय नो गोबां सुबुंफोरजों मोजां मोनजादोंमोन, अरुनासल नि रितो रिबा खौ सायखआसै तप 15 आव, गिबि आव सा 30 खौ सायखदोंमोन, बेयाव सायखजादोंमोन, बेनि उनाव जोबथा सा 15 खौ सायखनाय आव नाथाय सायखजायासै बिथाङा, रायजोफोरनि बादिब्ला सायखजानांगौमोन मानोना बिथाङा जागायनायनिफ्राय नो मोजां रोजाबदोंमोन होनना बुङो गोबाङानो, सुबुंफोरनि मोनसे ल सोंनाय, एसेबां मोजां रोजाबनानै बो मानो सायखआसै बिथांखौ, तुइतार आव सुबुंफोरा ईन्दियान आयदल बानायग्रा आरो बिजिरगिरिफोरनि सायाव रागा जोंनायखौ फोरमायदों, ईन्दियान आयदल श आ नंखाय होनना बुंनाय जों लोगोसे गोबाङानो सा सानजा भारत नि थाखाय नो बेबायदि खालामदों होनना बो अजद मोननाय नि खौरां।

सोमोनांथाव जाथाय, सासे सेंग्रा नि उदै निफ्राय दिहुनबाय 63 ता सामुस, उत्तर प्रदेश नि मुजाफ्फरनगर जिल्ला याव जादों होनना मिथिना मोनदों, सासे बेरामि नि उदै निफ्राय नो मोनसे नि उनाव मोनसे 63 ता स्तिल नि सामुस दिहुननाय जादों, बेरामि नि हालोद आ गाज्रि जादों होनना मिथिना मोनदों, खौरां मोननाय बादिब्ला पुलिस थाना मन्सुरपुर ओनसोल नि बोपादा गामि नि थागिबि बिजय मुंनि सुंबुं आ द्राग्स नि फारसे एदिक्त जादोंमोन, जायनि थाखाय थांनाय 5 दान सिगां नखर नि सुबुंफोरा सामलि जिल्ला नि द्राग दि एदिकशन सेन्तार आव थिसननाय जादोंमोन, बेयावनो बिनि देहा नि हालोद आ गाज्रि जादों, बेनि उनाव नो देहाफाहामसालि आव सोनाय जादोंमोन, देहाफाहामगिरिफोरा अपारेशन खालामो, आरो 63 ता सामुश मोनो, बेबायदि गिबि जाथाय जादों होनना देहाफाहामगिरि फोरा बुंदों, माबोरै सामुस फोरा फैखो मिथिनाय जायाखै होनना खौरां मोनदों।