2 September bodo evening news 2022 ~ Bodoinfo.com

भारत नि नेभि आव सोनाय जाबाय हादर आव नो बानायनाय INS Vikrant खौ. भारत नि गाहाय मन्थ्रि नरेन्द्र मोदि आ कोसि नि कोसिन शिपयार्द लिमितेद आ बानायनाय हादर नि गिबि श्वदेशि जाहाज खौ गथायना होनाय जायो, कोसिन शिपयार्द आव 20 रोजा कौति रां जों बानायनाय जोदोंमोन बेखौ, बे हाबाफारि आव गाहाय मन्थ्रि आ नेभि नि गोदान सिन खौ बो बेखेवो, बे हाबाफारि आव बिथांजों लोगोसे रैखाथि बिफान नि मन्थ्रि राजनाथ सिंह, केरला नि राज्यपाल, केरला नि गिबि मन्थ्रि आरो लोगोसे रैखाथि बिफान नि बिबानगिरि बिथांमोना बो बाहागो लादोंमोन।

सौदि आरब नि मोनसे बिजिरसालि आ ससियेल मिदिया बाहायनानै हादर नि खहा खालामनायनि दाय आव नोरा बिन्द साइद आल खातानि मुंनि सासे आयजो खौ 45 बोसोर जेल नि साजा होदों, दानसे नि गेजेराव बेयो नैथि जाथाय। हिउमेन राइत नि संगथन फोरनि सोंनाय आव सौदि नि अफिसारफोरा नि सायाव खौरां होनाय निफ्राय गोजानाव थादोंमोन। उदखारि बेरेखा आरो साइबार दाय नि आयेन नि सिङाव नोरा नो साजा होदों। अनलाइन आव पस्त खालामनायनि थाखाय नो बे साजा खौ होदों। नाथाय मा पस्त खालामदोंमोन बेखौ मिथिनाय जायाखै, थांनाय बोसोर आव नो हमदोंमोन आयजो खौ, दायो साजा खौ होबाय।

मेसेजिं एप ह्वात्स एप आ बन्ध खालामबाय 23 लाख नि बारा भारतारि नि एकाउन्त खौ, मिथिना मोननाय बादिब्ला जुलाइ दान आव 23.87 लाख नि बारा एकाउन्त खौ बेन खालामदों। बाहायग्राफोरनि जेबो अजद मोनालासैनो 14 लाख नि बारा एकाउन्त खौ बेन खालामदों, बेखौ ह्वात्स एप आ गावनो बुंदों। एप आ भारत नि आयेन एबा ह्वात्स एप नि नेम खौ सिफायनाय नि थाखाय नो बेखौ खालामदों, आगोलनि फोरनिखौ नायोब्ला मे दान आव 19 लाख, एप्रिल आव 16 लाख आरो मार्च आव 18 लाख नि बारा एकाउन्त खौ दानना होदोंमोन

गुजरात नि आरावल्लि आव लामा नि जाब्रबथाय आव सा 6 सुबुंफोरनि जिउ गोमादों। अम्बाजि मन्दिर आव थांबाय थानाय समाव नो जायो जाथाय आ, लामा नि सुबुं जों लोगोसे सा 6 नि जिउ गोमायो, जोखोम बो जादों सा 6 आ, बिसोरखौ लोगो लोगो देहाफाहामसालि आव लांनाय जायो, गिबि मन्थ्रि भुपेन्द्र पेतेल आ बे जाथाय नि थाखाय दुखु मोननाय फोरमायनायजों लोगोसे थैनायनि नखर नो 4 लाख आरो जोखोम जानाय नो 50 रोजा रां होनाय जागोन होनना फोसावदों, जोखोम जानायफोरनो मोजां फाहामथाय होनायनि बेबस्था खालामनो गिबि मन्थ्रि आ जिला बेंगिरि नो बिथोन होदों।

बाइसुं भुतिया खौ फेजेननानै अल ईन्दिया फुतबल फेदारेसन नि आफादगिरि जाबाय बारग फुतबल गेलेगिरि आरो बिजेपि नि दैदेनगिरि कल्यान सौबे आ, 45 बोसोर बैसो नि सौबे आ भुटिया बिथांखौ 31-1 भत जों फेजेनो, भारत नि फुतबल फेदारेशन नि 85 बोसोर नि जारिमिन आव गिबि खेब बारग गेलेगिरि आ आफादगिरि महरै सायखजादों, बारग गेलेगिरिब्लाबो नाथाय बिथाङा राजखान्थि जों सोमोन्दो दं। बिथाङा 45 बोसोर बैसो नि, भारत नि जानानै गलकिपार महरै गेलेयोमोन।

बृहस्पतिबारखालि रांखान्थि बिफान आ फोसावनाय बादिब्ला आगस्त दान आव जिएसति नि मोननाय धोन आ 28 जौखोन्दो बारायनानै 1.43 लाख कौति रां नि सिमा नि बारा थांदों। आगष्त दान आव थादनाय गैया जासै 6थि दान नि थाखाय 1.4 लाख कौति नि रां नि बारा जादों, आगष्त दान नि गासै 1,43,612 कौति रां नि आव सिजिएसति आ 24,710 आरो एसजिएसति आ 30,951 कौति, आरो थाबावनाय आ गुबुन गुबुन न।