Bodo news 14 September 2022 ~ Bodoinfo.com

दिनै बारग एनदिएफबि नि 34 थि मुंख्लं सान। बर हारि नि मोनथाय, रैखाथि नि थाखाय, आलादा बदलेन्द रायजो नि थाखाय मोनसे समाव आखाय आव हाथियार दैखांना लानाय बारग एनदिएफबि आ बितिआर गोरोबथा नि उनाव दिनै गिबि खेब मोनब्रैबो आफाद लोगो नांनानै कक्राझार जिल्ला नि सेरफांगुरि आव बे सान खौ फालियो। सेरफांगुरि नि कुमगुरि नि देजिगनेतेद केम्प आव सानसेनि हाबाफारि जों फालिनाय बे सान आव दिनै फुङाव नो बारग एनदिएफबि नि दैदेनगिरि आरो सोद्रोमाफोरा गोसोम बेज गाननानै 1 मिनित नि आरज जों मुंख्लं बिथांमोननि बर हारि नि थाखाय गावखौ बावनायखौ गोसोखाङो, बेनि उनाव नो गासैबो हाबाफारि फोरखौ मावलाङो। गुबुनफारसे खौरांगिरिफोरनि सिगाङाव बितिआर सोरखार नि ईएम रन्जित बसुमतारि बिथाङा दिनैनि सान खौ बारग एनदिएफबि नि थाखाय गोनांथार सान होनना फोरमायनानै सुक्ति बादियै एनदिएफबि नि रिहेबिलितेशन, रांखान्थियारि मदद बायदि नि खामानि आ सोलिगासिनो आरो लोगोसे जेल जानायफोरखौ उदां खालामनायजों लोगोसे गसरफोरखौ बोखारनायनि सायाव मिरु सोरखार जों सावरायनाय जादों होनना बुङो। दिनैनि बे हाबाफारि आव बारग एनदिएफबि आरो दानि एमसिएलए बि सावरायगोरा उरफे साइखं बसुमतारि, बारग एनदिएफबि नि बि जायख्लं, नाइस्रां औवारि, बिनायसा ब्रह्म जों लोगोसे बारग एनदिएफबि नि मोन 4 बो ग्रुप नि गोबां दैदेनगिरि सोद्रोमा फोरजों लोगोसे गुबुन गुबुन आफाद नि गोबां सोद्रोमा फोरा बाहागो लादों। गेवलां मेल आव गाहाय आलासि महरै बाहागो लायो बितिसि बिधान परिषद नि बुंथिगिरि कातिराम बर बिथाङा।

गुबुन रायजो नि साइबार दायनिगिरि नो शिम आरो एतिएम कार्द जगायना होनायनि दाय आव बङायगांव आव सा 3 सेंग्राफोरखौ हमदों, दासिमबो रायजो आव साइबार दायनिगिरि फोरनि गाज्रि खामानि खौ होबथानो हायाखै रायजो आव, हमजानाय सा 3 नि मुं खौ आश्राफुल ईश्लाम, बिल्लाल हुसेइन आरो मनिरुल ईश्लाम होनना मिथिना मोनदों। बिसोर सा 3 निफ्राय गंसे बाइक, गें 4 मबाइल, 18 ता सिम, 25 ता एतिएम, नोगोद 7930 रां मोनदों, गुबुन रायजो साइबार दायनिगिरिफोरनो सिम आरो एतिएम कार्द फोरखौ जगायना होयोमोन।

दुधनै आव जाथाय। 17 नं माहारियारि राजालामा याव गिथावना जाथाय। पलासबारि थाना नि पुलिस नि मोनसे दोलो नि गारि आ कनत्रल खोमानानै दालां नि रेलिं खौ सिफायना दै आव गोग्लैयो, गारि आव दंमोन पलासबारि थाना नि असि, बिजयनगर थाना नि आइसि आरो आयजों लोगोसे गासै सा 6 पुलिस, जोखोम जानायफोरा पलासबारि थाना नि असि जिवेन्द्र ब्रह्म, बिजयनगर थाना नि आइसि लाबन्य बर, लोगोसे हिरकज्योति बनिया, माइनुल हक आरो दिपालि बरा, जाथाय आव आसामि ईद्रिस आलि आ बो जोखोम जादों होनना मिथिना मोनदों, मा जाहोन नि थाखाय बेयो जाखो मिथिना मोनाखैब्लाबो गारि सालायनाय समाव उन्दुलांनाय आव नो बेयो जानो हागौ होनना साननाय जादों, गारि सालायग्रा या उन्दुनो मोनाखैमोन, जोखोम जानायफोरनि सानै नि हालोद आ गाज्रिथार होनना बो मिथिना मोनदों।

जिबौ आ जेसेबां बिष गोनां आ नो जा, लांदां आखाय जों नो हमो बियो, जिबौ हमनाय आ ओंखाम जों दै लोंनाय बादि गोरलैमोन बिनि थाखाय, नाथाय जिउ आव जिबौ जों गेलेनाय सुबुं आ नो जिबौ जों सौजाना जिउ गोमाबाय, सुरु नि गोगामेदि ओनसोल नि गंसे दखान आव जिबौ मासे ओंखारदोंमोन, लोगो लोगो खौरां हरदोंमोन राजस्थान नि स्नेकमेन महरै सिनायजानाय बिनोद नो, जिबौ खौ हमनो बे जायगा याव थांदोंमोन बिनोद आ, हमनो हाबायबो, नाथाय फिसा मोनसे गोरोन्थि नि थाखाय नो जिबौ जों अरजायो बियो, बिष गोनां जिबौ जों अरजानाय आव बिनोद तिवारि आ दसे उनाव नो थैयो, 45 बोसोर बैसो नि मोन, गोबां सुबुंफोरा नो बिखौ मोजां मोनोमोन, जायनि थाखाय नो बिनि जोबथा बिदाय होनाय हाबाफारि आव गोबां सुबुंफोरा थांदोंमोन, खौरां मोननाय बादिब्ला बिखौ जिबौ आ आसि आव अरदोंमोन। गासैबो सिसितिभि आव रेकर्द जाजोबदों।