September 18 bodo evening news 2022 ~ Bodoinfo.com

मैया फोसावबाय आसाम पुलिस नि गुबुन गुबुन बिफान नि 5252 मासि नि साख्रि नि रिजाल्त खौ, एस आई, कन्सतेबल एबि ईउबि, कामान्दो जों लोगोसे आरो गुबुन गुबुन मासि नि साख्रि नि फिथायखौ बिथांमोननि अफिसियेल वेबसाइत नि गेजेरजों फोसावो, खौरां मोननाय बादिब्ला गोबां सुबुंफोर जायफोरा बे साख्रि खौ मोनदों, गोबाङानो गोरिब नखर नि, गोबां खष्त खालामनाय, सोरनिबा बिफा या हाजिरा मावनाय, सोरनाबा मैगं थायगं फाननाय, नापित नि फिसाज्ला, साहा दखान होनाय आरो बेबायदि नो गोबां दं, बेफोर खौरां खौ मोननायनि उनाव साख्रि होनाय आव जेबो रोखोमनि बेले बेजे जायाखै होनना साननो हायो, दिनै रिजाल्त खौ होखांनायनि उनाव आसामनि दिजिपि भास्करज्योति महन्त बिथाङा खौरांमेलनि गेजेरजों जायफोरा उथ्रिसार जानो हादों बिथांमोननि सिम गाहाम हामलायनाय बावहरो, लोगोसे जायफोरा पास जायासै बिथांमोनखौ बो दुखु जानांगौनि गोनांथि गैया होनना फोरमायो, मानोना बुहुमाव मोनसेल आनजाद जों नो नोंनि जिउ लामा या होबथाजानाय नङा, जिउ आव गोबां खालामनो दं, आरो ईयुन आव गोबां आनजाद फैगोन, बेल नङा आरो गोबां आनजाद फैगोन, जायखौ मोजां नाजायोब्ला पास जानो हागोन होनना बुंदों, बिथाङा लोगोसे नो जायफोरा दिनै पास जाबाय बिथांमोना 22 सेप्तेम्बरखालि खानापारा नि भेतेरिनारि ग्राउन्द आव थांनो नांगोन होनना बुंदों एपइन्तमेन्त लेतारखौ लायनो थाखाय, बेयावनो होनाय जागोन, फुंनि 9 बाजि नि सिगां नो बेयाव नुजाथिहैनो खावलायो बिथाङा।

बाक्सा नि भारत भुतान सिमा नि सिब्रुबारि आव मासे हाग्रा नि मैदेरखौ बुथारनाय जाथाय बो जादों होनना मिथिना मोनदों, हाग्रा नि मैदेर आ माय जाफैबाय थानायनि थाखाय बिसन गयारि मुंनि सुबुं आ जायगा याव मोब्लिब कानेकशन खालामनानै दोननाय आव मैदेर आ बोगथाबजानानै जिउ गोमायो होनना मिथिना मोनदों, जिल्ला नि बाताबारि हाग्रा ओनसोल नि मावखुलि नि सिंनि सिब्रुबारि आव जादों, जाथायसालि आव हाग्रा बिफाननि दोलो आ थांदों, मिथिना मोननाय बादिब्ला हाग्रा निफ्राय फैनाय मैदेर आ माय आबाद जों लोगोसे गय, नारेंखल फोरखौ बो जाजोबलाङोमोन, बेनि थाखाय नो रागा जोंनानै बेबायदि खालामदोंमोन होनना मिथिना मोनदों। गुबुनफारसे बाक्सा नि नो भारत भुतान सिमा नि खैरानि आव मैया मैदेर नि गाग्लोबनाय आव सासे बर सुबुं नि जिउ गोमादों आरो लोगोसे सा 5 सुबुंफोरा जोखोम जानायनि खौरां मोनदों, थैनायनि मुङा रबिन्द्र बर, जोखोम जानाय फोरा बो गासैबो बर, अनिल दैमारि, थेंगोना मशाहारि, धनपति, परेश आरो सुलेन्द्र बर, मिथिना मोननाय बादिब्ला मैदेरखौ होखारनो थांनाय आव उल्थायै गाग्लोबजायो सो। मखजाथावदि बेबायदि मैदेरनि गाग्लोबनाय आव दासिम गोबां सुबुंफोरनि जिउ गोमाबाय।

मोनसे गिथावना सोमोनांथाव जाथाय खालामबाय सासे फरायसुलि आ, सन्दिगर बुहुमफरायसालि नि सा 60 फरायसुलिफोरा उदांयै दुगैनाय भिदिअ भाइरेल खालामनाय भिदिअ आ ईन्तारनेत आव भाइरेल जानायनि उनाव नो दावराव, सोमोनांहोदों बयखौबो। थासारि आ गाज्रिथार जानाय आव पान्जाब नि सोलोंथाय मन्थ्रि आ बयखौबो गोजोन थासारि लाबोनो खावलायदों आरो ससियेल मिदिया खौ मोजांयै बाहायनो खावलायदों, जोंनि बिनानाव फिसाजो नि मान सन्मान नि खोथा दं होनना बुंदों, सा 60 फरायसुलिफोरा हस्तेल आव थायोमोन, बुहुमफरायसालि नि नो सासे फरायसुलि आ बेनि भिदिअ बानायदोंमोन आरो सासे सेंग्रा नो बे भिदिअ खौ हरदोंमोन, बेबायदिनो 60 ता सो भिदिअ लिक जायो, बे भिदिअ आ भाइरेल जानायनि उनाव गोबां फरायसुलि फोरा गावखौनो बुथारना लानो नागिरनायबो जाथाय जादों होनना मिथिना मोनदों। दायो खौरां मोननाय बादिब्ला जाय हिनजावसा या बे भिदिअ खौ सिरियै बानायखुमादोंमोन बिखौ हमबाय पुलिसफोरा, पुलिसफोरनि सिगाङाव हस्तेल नि बिबानगिरि आरो गुबुन हिनजावसा फोरनि गनायथि लायालासै नो बे भिदिअ खौ बानायदोंमोन होनना गावनो बुंना लायो। सोमोनांथाव जाथाय।