पुलिस नि जे आव पुलिस, भिजिलेन्स आ
हमबाय कचुवा थाना नि एसआई खौ, नगांव जिला नि कचुवा पुलिस थाना नि एसआइ आ घुस
लादोंमोन, बेनि थाखाय नो हमजायो, हमजानायनि मुङा अनुप कटकि। जायगा नि सुबुंफोरनि
मोनसे गसर नि सायाव कतकि आ 5 रोजा रां घुस दाबि खालामदोंमोन, बेनि खौरां खौ
भिजिलेन्स आ मोनदोंमोन, सनिबार नि हर आव गुवाहाति निफ्राय फैनाय भिजिलेन्स नि दोलो
आ अनुप कतकि खौ 4 रोजा रां लानाय समाव हमो, जामिन नि मुङाव रां खौ लादोंमोन बियो।
मिथिना मोननाय बादिब्ला थाना नि सेकेन्द अफिसार महरै खामानि मावनानै खाथि आव नो
कार्तुन लाखिनानै घुस नि बाजार सालायगासिनोमोन, दायो हमजाबाय।
कक्राझार नि बदफा हाउस आव मैया मिरु
एबसु नि दैदेननाय आव त्राइबेल बेल्त आरो ब्लक निफ्राय दखल खालामग्रा फोरखौ
होखारनाय आरो जनजाति सुबुं फोरनि रैखाथि नि सायाव सावरायनाय जायो, बे सावरायनायनि
गुबै थांखि फोरा हा हु नि म्यादि, नामजारि जों लोगोसे त्राइबेल बेल्त एन्द ब्लक
निफ्राय आयेन बेरेखा यै दखल खालामना लानायफोरखौ होखारनाय, बे सावरायलायनाय आव एबसु
नि आफादगिरि दिपेन बर, त्राइबेल संघ निफ्राय आदित्य खाख्लारि, कार्बिआंलं अतनमास
काउन्सिल, बर कछारि वेलफेयार अतनमास काउन्सिल नि बिबानगिरि जों लोगोसे बितिसि नि
हा आरो रेभिनिउ बिफान नि बिबानगिरिफोरजों लोगोसे गोबां मेलेमजिबि बिथांमोना बाहागो
लादोंमोन। सावरायलायनायनि उनाव नो एबसु नि आफादिगिरि बिथाङा आसाम सोरखर खौ आयेन
बेरेखा यै दखल खालामना लानायफोरखौ होखारनो खावलायो, लोगोसे शनितपुर, बिश्वनाथ.
गोलाघात जों लोगोसे गुबुन जिला फोराव थानाय जनजाति फोरनो हा नि पत्ता होनो बो दाबि
दैखाङो, गुबुनफारसे फिन बियाब दानाय आयेन 2022 नि सिङाव बियाब फिन दानाय खामानि
मावनो थांनानै कक्राझार लोकसभा बियाब आव जाहाथे रावबो जनजाति नि थाखाय लाखिनाय
मोनथाय खौ खोमाना लाया बेनि थाखाय नोजोर होनो बिसायखथि आयोग नो गोसोखांलाय गथायदों
होनना बो बुङो बिथाङा।
साइबार दायनिगिरि आ आरमि नि द्रेस
गाननानै दिब्रुगर नि बिसि फिसाय निफ्राय 1 खावसे नि बारा लाख लुथिना लांनाय जाथाय
आ सोराङाव फैदों, अजद नि बादिब्ला दिब्रुगर नि बैरागिमथ नि थागिबि आसाम मेदिकेल
कलेज नि देहाफाहामगिरि डाँ सान्तनु बर नि बिसि डाँ शिल्पिका सुतिया नि बेंक
एकाउन्त निफ्राय लाना थाङो रां खौ, बिथांमोना मिथिहोनाय बादिब्ला आरमि नि मोहनबारि
नि केम्प निफ्राय 30 आरमि नि मोनसे दोलो आ हाथाय नि फाहामगिरि शिल्पिका सुतिया नि
खाथि आव फैनो थाखाय गोबां सान निफ्राय नो जगाजग खालामबाय थादोंमोन, गिबि समाव बेखौ
बारा गोसो होआखैमोन देहाफाहामगिरि आ, नाथाय आरमि नि द्रेस गाननानै बिथांनि आव
भिदिअ कल खालामनाय आव आरमि नि फारसे थानाय सनमान नि थाखाय उनाव सा 10 आरमिफोरखौ
सेम्बार आव फैनो गनायथि होयो। बे नंखाय आरमि आ देहाफाहामगिरि सिल्पिका खौ आगोलावनो
फिस होनो थाखाय बेंक एकाउन्त नम्बर लायो आरो उननि समाव रां लुथिना लाङो, दायो बिसि
फिसाय आ पुलिस नि खाथि आव थांदों, नागिरना मोनाखै होनना मिथिना मोनदों। नोंथांनि
लोगो आव बो जानो हागौ बेबायदि जाथाय आ, बेखायनो सांग्रां जा।
दरं जिला नि खारुपेति याव एसिद नि
गाग्लोबनाय जाथाय, बिसि खौ एसिद जों गाग्लोबो फिसाय आ नो, खारुपेतिया नि राम नगर
आव जादों, मिथिना मोननाय बादिब्ला 31 आगष्त खालि नो जादोंमोन जाथाय आ, नखरारि
नांलायनायनि थाखाय नो अमर धन मुंनि सुबुं आ गावनि न आव नो बेखौ खालामो, जायनि
थाखाय गाज्रियै जोखोम जायो बिसि आ, गाज्रिथार हालोद आव जिएमसिएइश आव लाना थाङो,
गुबुनफारसे बिसि नि बिमा नि नखर आ बिजामादै नि बेरेखा थाना याव एजाहार होबाय, बे
एजाहार नि सायाव नो नायबिजिरनानै हमो बिखौ, दायो जेल आव थानांदों।
कक्राझार आव जानो गोनां केबिनेत नि
जथुम आव नो बितिआर सोरखार आ गोरोबथा नि 6.3 नं दफा खौ मावफुंनो नांगौ, दाबि अल
बितिआर सोरखारि नङि गुदि फोरोंगिरि आफाद आ, मखजाथावदि मैया बिथांमोना धर्ना
हाबाफारि लादोंमोन, बेनि गेजेरजों गोसोखांहोदों, जों गोबां दुखु मोनदों, जों गोबां
नासयजादों, जों जाहाथे इयुन आव आरो आन्दोलन खालामनो गोनां जाया, जोंनि खामानि नङा
आन्दोलन आ, जों बाध्य आव सो आन्दोलन खौ खालामनो गोनां जादों, बेयाव धर्ना
होनायफोरहा फैनाय आव खमसिन रां नांगौ आ नो गैया होनना बो बुंदों, भेन्सार फरायसालि
आव फोरोंनानै रां नि आंखाल आव फोरोंगिरि थैनो गोनां बो जादों होनना बो बुङो। सासे
बर आयजो फोरोंगिरि आ बो खौरांगिरिफोरनि सिगाङाव बितिआर नि गाहाय प्रमद बर आ
आगोलनिफ्राय भेन्सार खौ लानानै बुंबोबाय थादोंमोन नाथाय दायो जोंखौ मानो नायफिनाखै
होनना सोंदों, आसा खालामनानै मावबोबाय थादोंमोन, दायो गाज्रि मोनदों होनना फोरमायो।
जों जोंनि जिउ आव गाबनांदों, मिनिजादोंमोन, बुंजानांगौ जादों होनना बो बुङो। गथ
गैयि समाव नो बेखौ मावदोंमोन, दायो गथ आ हायार सेकन्दारि 2थि बोसोर आव
फरायलायलाबाय होनना बो फोरमायो।
पाइलत आ नो सिखाव खालामबाय बिरखं खौ,
आमेरिका नि मिसिसिपि आव जादों जाथाय आ, सोमोनांहोदों बयखौबो, बिरखं खौ सिखाव
खालामनानै बिरहोनानै मिसिसिपि नि तोपेलो नि जायगायारि वालमार्त आव बिरखं खौ
खोख्लैनायनि वारनिं होनाय नि अजद पाइलत नि बेरेखा। बे खौरां खौ मोननाय नि उनाव नो
स्तर खौ लांदां खालामो जायगा नि पुलिस फोरा, बिएनए निउज आ सेयार खालामनाय मोनसे
भिदिअ आव नुनो मोनदों खम जौथाय आव नो बिरखं आ बिरबाय थानायखौ, बिरखं आ फुंनि 5
बाजि सो आव बिरदोंमोन, बेनि उनाव 3 घन्ता नि बारा सम बिरगासिनो थादोंमोन, अफिसार
फोरा बुंनाय बादिब्ला बिरखं आ किं एयार ताइप बिरखं, जाय बिसक्राफ्त आ बानायनाय
इउतिलिति बिरखं, सा 6 नङाब्ला सा 7 सो जिरायनो हायो बेयाव।
काछार नि श्रिकोना आसाम रायफल्स नि
केम्प आव जादों मोनसे गाज्रि जाथाय, सासे जवान आ केम्प नि सिङाव नो कोवार्तार आव
सिखा जों गोदना हानानै गावनि बिसि आरो 11 बोसोर बैसो नि फिसाजो खौ बुथारदों, बे
जाथाय आ सोमोनांहोदों बयखौबो, मिथिना मोननाय बादिब्ला फुंनि बाहागो आव केम्प नि
सिङाव कुवार्तार आव रबिन्द्र कुमार मुंनि जवान आ नो बुथारदोंमोन। केम्प आव गुबुन
सासे जवान आ रुमनि सिङाव थै नुनाय आव होस्रिखावना होनाय आव गुबुन जवान फोरा बो
थाङो, बेखौ खालामनानै जवान आ केम्प नि सिंनि मोनसे मन्दिर आव थाखोमायो। नखरारि
नांलायनाय नि थाखाय नो बे जाथाय आ जानायनि सन्देह, मन्दिर निफ्राय बिखौ हमनानै
सोंनाय आव बुथारनाय खौ बुंना लायो, बियो जम्मु काश्मिर नि थागिबि मोन, दायो
बिजिरसालि आ जवान खौ जेल आव लांनो बिथोन होयो।
रायजो आव बन्ध जाबाय 1710 गुदि
फरायसालि फोरा, रायजो आव फरायसालिफोरखौ लोगोसे खालामनायनि खामानि आ सोलिगासिनो,
गुबुन गुबुन दोलो संगथनफोरनि बेरेखा खालामनायनि उनाव बो बेखौ खालामदों होनना
मिथिना मोनदों। गासै 20 जिला नि 1710 फरायसालिफोरखौ बन्ध खालामनानै खाथि नि
फरायसालि जों दाजाबना होदों। बेनिनो बरपेता नि 62, बङायगांव नि 68, काछार आव 129,
दरं आव 64, धेमाजि आव 85, धुबुरि आव 56, दिब्रुगर आव 60, गोवालपारा याव 89, जोरहात
आव 182, नगांव आव 90 जों लोगोसे गुबुन गुबुन जिला फोराव गोबां फरायसालिफोरखौ बन्ध
खालामदों। सोलोंथाय मन्थ्रि डाँ रनुज पेगु बिथाङा फैगो समाव बो बेयो सोलिबाय थागोन
होनना बुंनाय जों लोगोसे मेत्रिक आव लाथिख रिजाल्त आरो खम फरायसा थानाय
फरायसालिफोरखौ बन्ध खालामनायनि थांखि खौ जोबथायै थि खालामनानै बेनि सायाव खामानि
मावगासिनो होनना बुङो।
आलफा उदां नि केम्प निफ्राय सा 4
केदारफोरा खारखुमाना फैनायनि खौरां, असमिया खौरां बिजों फोरनि बादिब्ला म्यानमार
नि बिसोरनि केम्प निफ्राय नो खारखुमादों सा 4 आ, थांनाय बृहस्पतिबारखालि नो
खारखुमादोंमोन आरो बै साननिफ्राय नो गोमाना दं बिसोर। आलफा याव साननै सिगाङाव सो
बेबायदि नो एखे जाथाय आ जादोंमोन, जेराव खारखुमनायखौ हमनो हानायनि उनाव थैनाय नि
साजा होनाय जादोंमोन, संगथन नि नेम नि बेरेखा खामानि मावनायनि अजद।
तिनसुकिया काकपथार ओनसोल नि लाजुम गामि
आव मैया द्राग्स फालांगिरि खौ थांखि खालामनानै पुलिस नि गावनाय गुलि आव जिन्तु
मरान मुंनि सुबुं आ जोखोम जादों होनना मिथिना मोनदों, पुलिस नि बे नायबिजिरनाय आव
सा 3 फालांगिरि आ खारखुमादों होनना मिथिना मोनदों, नायबिजिरनाय दोलो आ जाथायसालि
निफ्राय गोबां बिबां नि ब्राउन सुगार जब्द खालामदों, द्राग्स नि बेसेन आ लाख रां
नि होनना बुंदों।
2 खावसे बोसोर नि उनाव फिन सोलिबाय
गुवाहाति निफ्राय गुबुन हादर आव बिरखं नि थांलाय फैलाय आ, लोकप्रिय गोपिनाथ बरदलै
बिरखं गाथोन निफ्राय शिंगापुर आव थाङो बिरखं आ, भुतान खौ लाफानानै दानिया खाथि नि
गोबां हादरफोराव थांग्रा जासिगोन गुवाहाति निफ्राय, दावबायारिफोरनि थाखाय मोजां
खौरां, फुंनि समाव नो भुतान निफ्राय सा 22 दावबायारिफोरखौ लानानै फैनाय बिरखं आ
गुवाहाति आव ओंखारदोंमोन, बिरखं आ मोनफैनायनि उनाव नो आसाम निगुबुन गुबुन जायगा नि
सा 15 सुबुंफोरा सिंगापुर आव थांनो होनना बरझार आव थाङो, बेनि उनाव नो भुतान नि सा
22 आरो आसामनि सा 15 खौ लाफानानै गासै सा 37 जों फुंनि 9.10 आव शिंगापुर आव थाङो,
खौरां मोननाय बादिब्ला सिंगापुर आव सप्तायाव सानसे सनिबारखालि थांगोन।
bodoinfo.com provides informations regarding State Government, Central Government and Private sector jobs for the aspirants of assam.
Please do not enter any spam link in the comment box. ConversionConversion EmoticonEmoticon