शनितपुर नि सितलमारि आव दिनै प्रसासन नि होखारनाय खामानि, बरसला नि सितलमारि आव फुंनिफ्राय नो बे खामानि खौ मावो, गोबां पुलिस आरो रैखाथि बिफान नि नुजाथिनाय आव न फोरखौ सिफायो प्रसासन आ, न फोरखौ सिफायदोंब्लाबो न नि बिगोमा फोरा आगोलावनो न खौ गारना थांखादोंमोन। मिथिना मोननाय बादिब्ला बिसोर गोबाव सम निफ्राय नो हा खौ दखल खालामना लादोंमोन। दिनै गासै 299 नखर फोरखौ होखारस्राङो, गासै 1000 बिघा हा खौ उदां खालामो, बे हा याव दायो सोरखार आ सलार पावार प्लान्त गायसनगोन, 2021 मायथाइ नि 15 दिसेम्बर आव नो बरसला बियाब नि 1 रोजा बिघा खौ दखल खालामग्राफोरनिफ्राय उदां खालामनो बिथोन होदोंमोन, बेनि उनाव नो गोबाङानो बेनिफ्राय थांदोंमोन। बेयाव जेबो रोखोमनि दुंहाव थासारि सोमजिनायनि खौरां मोनाखै।
मनिपुर आव जेदि(इउ) नि गिदिर खहा, सा 5 बिजेपि नि एमएलए फोरा बिजेपि आव हाबबाय। एमएलए फोरा थांमेइबेन्द, तिपाइमुख, जिबिराम, वांखेइ आरो सुरसान्दपुर बियाब नि मोन। बेनि सायाव दायो सा 5 एमएलए फोरा बिधानसभा नि बुंथिगिर नि सिम लाइजाम हरदों, दायो संबिधान नि मोनसे नेम बादियै जेदिइउ निफ्राय बिजेपि नि एमएलए महरै सिनायथि होनो खावलायो, बेनि गेजेरजों मनिपुर आव दायो बिजेपि नि एमएलए नि अनजिमा या 37 जाहैबाय, जेदिइउ नि गासै सा 6 एमएलए दंमोन, नाथाय दायो सासेल सो दंसै।
कमनवेल्थ गेम्स आव सना नि मेदेल मोननाय नयनमनि सइकिया नो दिएसपि नि थिसनलाय होबाय, गिबि मन्थ्रि आ बेखौ होयो, लोगोसे 50 लाख रां बो होदों होनना बुङो, गेलेनाय पेन्सन सान नि थाखाय खुंनाय जनता भवन नि हाबाफारि आव नो होनाय जायो बिथांनो। दिनै लोगोसे सा 8 गेलेगिरिफोरनो गेलेनाय पेन्सन बो होनाय जायो, सा 4 मोजांसिन एनसिसि केडेत नो बिर सिलाराय बान्था बो होदों। दिनै अर्जुन भोगेस्वर बरुवा नि 82 थि जोनोम सान, बिथांनि जोनोम सान आव नो बेखौ फालिनाय जायो।
आसाम स्तेत रुराल लाइभलिहुद मिशन, चिरां जिला नि दैदेननाय आव सखि एक्सप्रेस 2021-22 रांखान्थि बोसोर नि बिथांखि जों सोमोन्दो थानाय सिदलि आरो बरबाजार जौगाखां खोन्दो नि सिङाव 56 स्कुति फोरखौ राननानै होयो, बे हाबाफारि आव गाहाय आलासि महरै नुजाथिनानै सिदलि बियाब नि एमएलए जयन्त बसुमतारि बिथाङा स्कुति नि साबि फोरखौ होयो।
Please do not enter any spam link in the comment box. ConversionConversion EmoticonEmoticon