आसामनि
सेकन्दारि ईदुकेशन नि नि दायरेक्तर ममता हजाइ बिथाङा बितिआर नि भेन्सार फरायसालिफोरनि
मुं फारिलाय खौ फैगो 22 आगष्त नि सिगां नो गथायनो खावलायदों, 22 आगष्त नि सिगां नो
गासैबो एलपि, इउपि, गोजौ फरायसालि, जौसिन फरायसालि, सिनियर सेकन्दारि नि फारिलाय खौ
होनो नांगौ होनना फोरमायो। मखजाथावदि आसामनि सोलोंथाय बिफान नि मन्थ्रि रनुज पेगु
बिथाङा बो बितिआर गोरोबथा नि दफा बादियै सोरखारि नङि फरायसालिफोरखौ सोरखारि
खालामनाय जागोन होनना फोसावदोंमोन।
रायजो आव आरोबाव
सासे अफिसारखौ हमबाय घुस लानायनि दाय आव, मैया बृहस्पतिबार खालि हमजानाय सोरखारि
मावथि नि मुंखौ जतिन्द्र नाथ रय होनना मिथिना मोनदों। बियो आसामनि धुबुरि जिला नि
हादुरहात धरमसला जौसिन फरायसालि नि गोजौ बिफान नि बिबान मोनदोंमोन, बियो मैया
हमजानाय समाव रां दाबि खालामना लादोंमोन सारभिस सित आरो एलपिसि त्रेन्सफार खालामनायनि
मुङाव। रायजो आव रां लानायनि बेरेखा अपारेशन आ सोलिगासिनो दं, साननै सिगाङावबो
सासे बर सोलोंथाय बिफान नि अफिसारखौ बो हमदोंमोन रां लानायनि समाव।
दानि बितिसि
नि गाहाय प्रमद बर बिथांखौ आसाम सोरखार नि आजिरा मोननाय अफिसार अमरशिं ब्रह्म
बिथाङा गोख्रों राव जों सोंखारिदों, बितिसि नि 6 थि सिदिउल नि सिङाव थानाय पावार
आरो फांसन खौ 31 दिसेम्बर नि गेजेराव लाबोफिननो हायाब्ला रिजाइन होनो नांगौ होनना
बुंदों। आगोलनि बितिसि आरो दानि बितिआर दफा नि सोमोन्दै गियान दं ना गैया होनना
सोंनाय जों लोगोसे बितिआर गोरोबथा नि द्राफ्त खौ सोर खालामनाय होनना सोंदों, बेखौ
सोरबा एसिएस आईएएस अफिसारजों सो खालामदोंनामा सन्देह जादों होनना फोरमायनायजों
लोगोसे बेखौ बुजिनानै सहि होदोंना होनना बो सोंबावदों, बुजियाखैमोनब्ला सहि होनो
नाङामोन, बितिसि गोरोबथा याव मोननाय बोलो खौ फोजोबबाय, साख्रि होनाय निफ्राय
लानानै गोबां बोलो खौ खोमाना लानायनि अजद, सेलेकसन बर्द खौ बो दानो हाया, बितिसि
आव माबोरै गुबुननि आ साख्रि मोनखो, बेयाव थाखानाय आ माबोरै त्रेन्सफार जाखो। गासैबो
आसाम सोरखार नि गेजेरजों जायोब्ला नोंथांनि पावार आ बहा थांखो, पावारलेस सिईएम
नामा होनना बो सोंबावो। बितिसि नि थागिबिफोरखौ थगायनो नाङा, गर्खा फोरा माबोरै
प्रतेकतेत क्लास आव थानो हाखो, मानो बेरेखा खालामनो हायासै, नोंथाङा सासे एबसुनि
लिदार मोन, आंबो लिदार मोन, माबोरै बर नि बेरेखा खालामनो हायो। दानि सोरखार आ बितिसि
मुं जों नो दं, बितिआर आ सोरखार नङा, गोबाङानो बुङो बितिआर सोरखारि बितिआर सोरखार
होनना, बितिसि नि एरियाफोरखौ बितिएदि मुं जों मिथियोमोन, नाथाय दायो बेसो बितिआर
जादों, नाथाय दासिमबो बेयो बितिसि नि सिङावनो दं, नोंथांनि अफिस आव सिल, अफिस
रेकर्द, तेमप्लेत, पेद आव बितिसि सोरखार ना बितिआर सोरखार लिरो होनना बो सोंदों,
बर जामबा जामबि फोरखौ थगायगासिनो होनना बो अजद होदों, सैथो खोथा जों सोलि, सैथो
जों खामानि माव देरहासाद जागोन, असैथो जों थाङोब्ला इयुन आ खोमसियाव फैगासिनो दं
होनना बो बुंबावो बिथाङा।
एपिएससि नि
गोदान सेयारमेन नि बिबान मोनबाय भुषन देब चौधुरि बिथाङा, आईएएस बिथाङा आगोलावबो
एपिएससि नि बिबान खौ लादोंमोन, आगोलाव आनजाद नि कनत्रलार नि बिबान मोनदोंमोन, बेनि
सिगां बो सोलोंथाय बिफान नि सेक्रेतारि नि बिबान आव बो दंमोन। मखजाथावदि एपिएससि नि
गोबां केलेंकारि जानाय आ सोराङाव फैदोंमोन, दासिमबो नायबिजिरनाय आ सोलिगासिनो दं, मखजाथावदि
बिथाङा आगोलाव नलबारि जों लोगोसे गोबां जिला फोरनि जिला बेंगिरि बो जादोंमोन।
रासिया नि
सोरखार आ रासिया नि आयजोफोरखौ खमावनो सा 10 गथ जोनोम होनायनि सायाव बोलो होदों,
आयजोफोरखौ बे खामानि नि थाखाय बान्था महरै रां नि बाथ्रा बो फोसावदों सोरखार आ,
हादरगिरि भ्लादिमिर पुतिन आ 13 लाख रां फोसावदों सासे आयजो आ सा 10 गथ जोनोम होनो
हायोब्ला। जाय समाव भारत आरो चिन आ जोनोम खौ कनत्रल खालामनो बायदिसिना राहा लामा
हिदुननो नाजागासिनो बे समाव रासिया या उल्था फारसे सो थांनाय बादि। फैगो 5 बोसोर
आव रासिया नि सुबुं अनजिमा या खावसे जागोन, रास्त्रसंघ नि रिपर्त आव बेखौ मोनदों,
कभिद नि उनाव ईउक्रेर्इन जों दावहा, बेयाव गोबां सुबुंफोरनि जिउ गोमादों, सुबुं
अनजिमा या खम जालांदों, बेनि थाखाय नो बेखौ खालामनायनि सन्देह, दावहा याव 50000 सो
आरमिफोरनि जिउ गोमानायनि खौरां मोनदों, लोगोसे दायो कभिद नि गोसारनाय आ बो बारा
जालांगासिनो दं, जायनि थाखाय नो बे थिरांथा खौ लादों होनना साननाय जादों। नाथाय
गुबुनफारसे गोबाङानो सोंदों, 13 लाख रां ल जों सा 10 गथ खौ नायनो हागोन ना, आरो
लोगोसे सासे आयजो आ सा 10 गथ होनाय आव देहा नि हालोद आ माबायदि जागोन, बेफोर सम्भब
ना।
मैया 18 आगस्ट, 2022 खालाराव
दिसपुर जनता भवननि ब्लक F नि ग्राउण्ड फ्लराव थानाय फाइनेंस दिपार्टमेन्तनि हलाव आसामनि मानिनां
सोलोंथाइ मन्त्रि ड० रनुज पेगुजों एबसु, बर' थुनलाइ आफाद, आसु आरो आसाम
साहित्य सभानि दैदेनगिरिमोना जथायै आथिखालाव आसाम सोरखारनि केबिनेट आरो सोलोंथाइ
बिफाना सोलोंथाइनि सायाव लानाय माखासे थांखिफोरनि सायाव गुवारै आरो गोथौयै
सावरायनाय जायो। बाहागो लानाय
मोनब्रै माहारियारि आफादनि बिबानगिरिमोना आसाम सोरखारनि केबिनेट आरो सोलोंथाइ
बिफाना सोलोंथाइनि सायाव लानाय थांखिफोरनि सायाव अजद दैखाङो आरो सोरखारनि थांखिफोरखौ
थोंजोंयै गनायना लाया होननानै रोखायै फोरमायनानै होयो आरो सोरखारनि थांखिफोरखौ
बोखांनानै लानो खावलायो। गाहायाव होनाय
सोरखारनि थांखिफोरखौ गनायनाय जाया होननानै रोखा खालामना होयो।
(1) आसाम सोरखारा
केबिनेटआव आजावनाय भेनसार फरायसालिफोरखौ सोरखारि खालामनाय जानाय नंलिया होननाय
थांखिखौ माब्लाबाबो गनायनाय जाया होननानै रोखायै बुंथिनानै होयो आरो बे थांखिखौ
फिन सानफिननो सोलोंथाइ मन्थ्रिखौ खावलायो।
(2) थाखो 3 (थामनि) फ्राय
थाखो 12 (जिनै) सिम
गोर्लै सानखान्थि आरो बिगियान आयदाखौ इंराजी बिजोंआव फोरोंथाय होनायखौ माब्लाबाबो
गनायनाय नङा।
(3) थाखो 6 निफ्राय थाखो 12 सिम सोरखारा
बिमा राव बिजोंनि फरायसालियाव मोननै बिजों (इंराजीबो) बाहायनो लानायखौ opposed खालामो
(4) गेदेर जिलायाव
गं 10 आरो उन्दै
जिलायाव गं 5 मिक्स बिजोंनि
फरायसालिफोरखौ इंराजी बिजोंआव सोलायहोनानै आदर्श फरायसालि खालामनो थांखि लानायखौ opposed खालामनाय
जायो।
(5) आसामनि मोन 126 Assembly constituency फोराव साबसिन
फरायसालिखौ गंफायै CBSE
affiliation खालामनानै इंराजी बिजों खालामनो नागिरनायखौ opposed खालामनाय जायो
।
मुंख'जाथावदि
मानिनां सोलोंथाइ मन्थ्रि ड० रनुज पेगु बिथाङा मोनब्रै आफादनि थांखिफोरखौ
खोनासंनानै बैफोर आयदानि सायाव फैगौ सेप्तेम्बर दानआव फिन सावराफिननानै बेफोर
जेंनाफोरनि सायाव solution नि लामा
दिहुननो खोथा होयो। मैयानि सावराय
मेलआव मिरु एबसुनि मानिनां आफादगिरि मुस्री दिपेन बर', लेङाइ
आफादगिरि फारियै मुस्री खोरोमदाव वारी, मुस्री रोमदोन बसुमतारी, गाहाइ
नेहाथारि मुस्री खनिन्द्र बसुमतारी, लोगो गाहाइ नेहाथारि दिनेश ब्रह्म, गेलेमु
नेहाथारि मुस्री गनेश बसुमतारी, सोलोंथाइ नेहाथारि मुस्री सोमावसार बसुमतारी
बिथांमोना बाहागो लायो । मुंख'जाथावदि मैयानि
हाबाफारियाव बर' थुनलाइ आफादनि
मानिनां आफादगिरि मुस्री तरेन बर', गाहाइ नेहाथारि मुस्री प्रसान्त बर' आरो बर' थुनलाइ आफादनि
दैदेनगिरिफोर, AASU नि Chief Adviser Dr. Samujjal
Bhattacharya, आफादगिरि मुस्री दिपांक कुमार नाथ, गाहाइ नेहाथारि मुस्री शंकरज्योति बरुवा आरो
गोबां दैदेनगिरि, आसाम साहित्य
सभानि आफादगिरि ड० कुलधर शइकीया, गाहाइ नेहाथारि मुस्री जादब शर्मा बिथांमोना
बाहागो लायो।मुंख'जाथावदि
सोलोंथाइ मन्थ्रि बिथाङा बि.टि.आर. गोरोबथानि 6.3 दफा बायदियै
गासैबो भेनसार फरायसालिफोरखौ सोरखारि खालामनाय जागोन होननानै रोखायै बुंथियो
आरोबाव बि.टि.आर. नि बायजोनि बर' मैखोम ओन्सोलाव थानाय बर' बिजोंनि
भेनसार फरायसालिफोरखौबो सोरखारि खालामनाय जागोन होननानै रोखायै फोरमायना होयो। आसाम सोरखारा elementary आरो secondary फरायसालिफोरनि
infrastructure
फोरखौ जौगाहोनो फारियै 3,000 crore आरो 10,000 crore रां बावजा थि
खालामबाय आरो बेखौ फैगौ सेप्तेम्बर दाननि Assembly session आव पास
खालामनानै मावफुंनाय जागोन होन्नानै सोलोंथाइ मन्थ्रिया मिथिहोयो।
हिन्दि सावथुन
नि बादि लुथिना लांबाय बेंक खौ, सिबिआइ नि सुबुं होनना सिनायथि होदोंमोन,
जामशेदपुर नि मानगौ आव थानाय बेंक अफ ईन्दिया नि गंसे बेंक आव दाखाथि नि जाथाय जादों,
सा 4 हाथियार लानाय गाज्रि सुबुंफोरा बेंक निफ्राय 35 लाख रां लुथिना लाना थांबाय,
जाथायनि सोमोन्दै मिथइनाय बादिब्ला फुंनि 10.30 सो आव बेंक आव बिसोर हाबनानै
गावखौनो सिबिआइ नि सुबुं होनना बुंदोंमोन। गिबि आव हाबनानै सिबिआइ नि अपारेशन
होनना बुंना गासैनिबो मबाइलफोरखौ लाजोबो, बै समाव बेंक आव सा 12 सो सुबुंफोर
दंमोन, जाथायनि समाव सा 4 आ मास्क लादोंमोन, उनाव हाथियार दिन्थिनानै रां खौ लाना
थाङो, पुलिसफोरा दासिमबो हमनो हायाखै होनना खौरां मोनदों, अक्षय कुमार नि
स्पेशियेल 26 सावथुन नि बादि लुथिना लांबाय रां खौ।
तियक नि
काकजान आव गिथावना जाथाय, सासे सेंग्रा या हिनजावसा खौ गोबौ हाथियार जों
गाग्लोबनानै गावबो गावखौनो बुथारदों, गाग्लोबजानाय हिनजावसा या अभयापुरि नि होनना
मिथिना मोनदों, सेंग्रा नि न आव तेजपुर आव मोन, मुङा मफिजुल ईश्लाम, बे जाथाय नि
उनाव नो पुलिसफोरा नायबिजिरनायखौ जागायबाय, नाथाय रायजोफोरा पुलिसफोरनि मावनाय खौ
गोजोननाय मोनाखै होनना फोरमायो।
मुम्बाई नि रायगर
आव हाय एलार्त, लैथो आव गोबां हाथियार थानाय सन्देह गोनां नाउ मोनदों, महारास्त्र
नि रायगर आव मोनसे गिदिर गिथावना जाथाय खालामनाय नि थांखि लादोंनामा। नाउ निफ्राय
एके 47 रायफल आरो गुबुन हाथियारफोर आरो कार्त्रिज मोनदों, नाउ आ गंसे ना हमनाय नाउ
मोन जाय लैथो आव गोबाव सान निफ्राय नो दंमोन, बे नाउ आव रावबो गैयामोन, जेब्ला
खाथि नि ना हमग्रा फोरा नाउ नि खाथि आव थांनाय नि उनाव सन्देह जादोंमोन आरो लोगो
लोगो पुलिस नो खौरां हरनाय आव पुलिसफोरा थांनानै नायबिजिरहैनाय आव नो बेखौ मोनो,
मखजाथावदि 2008 मायथाइ नि 26 नबेम्बर आव जानाय गिथावना उदखारि गाग्लोबनाय आव उदखारि
फोरा नाउ जों नो मुम्बाई आव हाबदोंमोन।
Please do not enter any spam link in the comment box. ConversionConversion EmoticonEmoticon