दिनै बनसु आ
बदलेन्द दाबिनायनि थांखि जों दिल्लि नि जन्तर मन्तर आव थांनानै धर्ना हैदों। जै बर
हारि नि जै, वि वान्त बदलेन्द, न बदलेन्द न रेस्त, दिभाईद आसाम 50-50, भारत माता
कि जै बायदि स्लगानफोर होनायखौ नुनो मोनदोंमोन, बेनि गेजेरावनो हाबाफारि आ सोलिबाय
थानाय समाव दिल्लि पुलिस आ बे धर्रा होनाय नि दैदेनगिरिफोरखौ खादों होनना बो खौरां
मोनदों। बेनि गनायथि लाखादोंमोन होनना खौरां मोनदोंमोनब्लाबो माबोरै बेबायदि जाखो
खौरां मोनाखै बे हाबाफारि आव गुबुन गुबुन आफाद निफ्राय 700 सो सुबुंफोरा बाहागो
लादोंमोन होनना सानसुमा खुंगुर बैसुमिथियारि बिथाङा बुंदों। मालति नार्जारि बिथाङा
बुंदों बदलेन्द सोमावसारनाय आव 7000 नि बारा सुबुंफोरा मुंख्लं जादों होनना बो
बुंदों, बेफोरनि अनगायैबो गोबां हिनजावसा आयजो फोरखौ जिनाहारि बो खालामदोंमोन,
बेफोर जोबोद दुखुनांथाव होनना बो बुङो। बे सोमावसारनायनि उनाव नो भारत नि हादरगिरि
द्रौपदि मुर्मु, गाहाय मन्थ्रि नरेन्द्र मोदि, नखर मन्थ्रि अमित शाह बिथांमोननो
गोसोखांलाय गथायनानै फैदों होनना बो खौरां मोनदों।
FCI आ गासैबो
अजदफोरखौ नंखाय होनना फोरमान होबाय आसामनि माय खौ बायनानै, गुबुनरायजोफोरनिखौ
रुजुयोब्ला आसामनिखौ बांसिन बायदों, आसाम आव आबादारिफोरनिफ्राय बारा मा बाया होनना
आगोलनिफ्रायनो अजद होबोगासिनोमोन गोबांङानो, हादरनि गेजेरावनो आसाम आव बांसिन माय
बायनायनि रेकर्द खालामो। खौरां मोननाय बादिब्ला माय बायनायनि जोबथा सान सिम एबा 31
जुलाई सिम 4.43 लाख मेत्रिक तन माय बायदों, बेनिनो 2.09 लाख खौ एफसिआई आ आरो 2.34
लाख मेत्रिकतन खौ रायजो सोरखार आ बायदों, रायजो सोरखार आ 10 लाख मेत्रिक तन बायगोन
होनना थांखि लादोंमोनब्लाबो बेयो जाफुङासै, नाथाय थेवब्लाबो गुबुन रायजो नि खौ
नायोब्ला आसामनि आ नो बारासिन जादों बायनाय आ, आगोलाव हादरनि बांसिन माय दिहुननाय
रायजो पान्जाब निफ्राय 1.69 लाख मेत्रिकतन माय बायदों होनना खौरां मोनदों।
दरं नि
कुमारपारा याव रायजोफोरजों हमजाबाय सासे सुबुं आ जाय हिनजावसा सासे खौ मोजां
मोननायनि प्रस्ताब होना लाना। रायजोफोरजों हमजानायनि उनाव गाज्रिथार हालोद आव
पुलिसफोरा लाना थाङो, कलाईगांव बियाब नि सिंनि बोक्राझार ओनसोल नि आलताफ हुसेईन
मुंनि सेंग्रा या सिपाझार नि कुमारपारा गामि नि सासे 10 थाखो नि फरायसुलिखौ मोजां
मोननायनि प्रस्ताब होदोंमोन, गोबाव समनिफ्राय नो मबाईल मेसेज नि गेजेरजों मेलेमारि
नारसिनथाय होबोगासिनोमोन। मैया 7 आगष्त रबिबारखालि सेंग्राया कुमारपारा याव फैनानै
हिनजावसा खौ लोगो हमनो नाजानाय समाव नो नखरनि सुबुंफोरा बे सेंग्रा खौ बाईक जों
गिबि आव सौख्राङो, थासारि आ गाज्रिथार जानायनि उनाव नो सेंग्रा या खारखुमानो
नागिरनाय समाव नो होसो होसो हमो आरो मारपित खालामो, दायो हिनजावसा नि बिफा या थाना
याव एजाहार होबाय।
भारत आ आरो
मोनसे सना नि मेदेल मोनदों दिनै, बेदमिन्तन गेलेगिरि पिभि सिन्धु आ फाईनेल आव
कानादा नि मिसेल लि खौ 21-15 आरो 21-13 जों फेजेनो, जागायनायनिफ्रायनो मोजां
गेलेनो हाखादोंमोन सिन्धु आ, बेनि गेजेरजों भारत आ 19 ता सना मोनना निउजिलेन्द खौ
बारनानै 4 थि नम्बर आव थानो हादों
जापानिस एनकेफेलाईतिस
बेराम आ सा 3 गोदान सुबुंफोरनि जिउ फोजोबलायबाय, दासिम रायजो आव 63 जाबाय थैनाय आ,
थांनाय 1 जुलाई निफ्राय लानानै दासिम आसाम आव 347 केस मोनदों। बोसोरफ्रोमबो
जापानिस एनकेफेलाईतिस आरो मेलेरिया या गोबां सुबुंफोरनि जिउ फोजोबो आसाम आव, बे
बोथोर आव नो बांसिन जायो।
bodoinfo.com provides informations regarding State Government, Central Government and Private sector jobs for the aspirants of assam.
Please do not enter any spam link in the comment box. ConversionConversion EmoticonEmoticon