22 August bodo evening news 2022 ~ Bodoinfo.com

अनलाईन थगायग्राफोरनि जे आव गोबां सुबुंफोरा नो गोग्लैनायनि खौरां खौ मोनबाय थायो, बे बार आव प्रफेसार आ नो जे आव गोग्लैबाय, गौहाति मुलुगसोलोंसालि नि भाइस सेन्सेलर प्रतापज्योति सन्दिकै नि मुं लानानै जे आव खोख्लैयो। मुलुगसोलोंसालि नि सासे प्रफेसार निफ्राय लाख रां लुथिबाय, जिउग्राफि बिफान नि प्रफेसार अनुप शइकिया या लुथिजादों, मखजाथावदि थआंनाय 14 आगष्त खालि 7722991836 नम्बर निफ्राय प्रफेसार निसिम ह्वात्सएप मेसेज फैदोंमोन, बे मेसेज फोराव मदद बिदोंमोन प्रफेसार निफ्राय आरो एमाजन पे नि गिफ्त कुपन बायनायनि बाथ्रा बुंदोंमोन, भाइस सेन्सेलर नि मुं लानायनि थाखाय प्रफेसार आ बायदोंमोन बो लाख रां नि कुपन खौ, नाथाय मुलुगसोलोंसालि नि रेजिस्त्रार निफ्राय फैनाय सांग्रांथि नि मेसेज फैनाय आव नो जाथाय खौ मिथियो, दायो जाथाय नि सायाव एजाहार होनाय जाबाय होनना मिथिना मोनदों।

दुलाराय बाथौ गौथुम नि आफादगिरि, सोलोंथायगिरि, समाज सिबियारि डां लिलाधर ब्रह्म बिथांनि जिउ आ मैया गोमानाय आव बितिसि नि गाहाय प्रमद बर, ईएम दिगन्त बरुवा, बर थुनलाइ आफाद, दरं जिला साहित्य सभा, मंगलदै प्रेस क्लाब जों लोगोसे गोबां सुबुंफोरा नो दुखु मोननाय फोरमायदों, मखजाथावदि बिथांनि गोथै देहाखौ भकतपारा नि गावनि न आव लाबोनानै दिनै गुबुन गुबुन दोलो संगथन फोर जों लोगोसे सुबुंफोरा जोबथा बिदाय होनाय जायो। बर थुनलाइ आफाद आ मोनसे प्रेस रिलिज नि गेजेरजों जोबोद दुखु मोननाय फोरमायनायजों लोगोसे गोथार जिउमा या जाहाथे आलो गोजोनै थाहैयो बेखौनो आनन गसाइ नि खाथि आव आरज गाबबाय होनना फोरमायो, आफाद आ नखर निसिम बो दुखु मोननाय खौ दैथायहरदों होनना बो बुङो।

बङायगांव आव फुजा नि प्रसाद जानानै गोबां सुबुंफोरा नो बेराम आव गोग्लैदों, बङायगांव नि घिलागुरि आव जादों होनना मिथिना मोनदों, हर आव राम प्रसाद सरकार मुंनि सुबुं नि न आव सत्यनारायन फुजा दंमोन, बेयावनो प्रसाद जानानै सा 30 सो सुबुंफोरनि देहा या गाज्रि जायो, बेनिनो सा 6 आ उन्दै गथ फोर, गोबां सुबुंफोरनि देहा नि हालोद आ गाज्रिथार, दायो बङायगांव सिभिल देहाफाहामसालि आव फाहामथाय लागासिनो दं।

आसाम पुलिस आ रबिबारखालि सनितपुर नि गुदामघात निफ्राय हमो सालेह आहमेद मुंनि सासे फालांगिरिखौ, अजद नि बादिब्ला सासे सेंग्रा खौ थांखिनानै गुलि गावनाय नि थाखायनो पुलिस आ हमो शालेह खौ, रिपर्त नि बादिब्ला रबिबारखालि काछार जिला नि सालेह आहमेद आरो फारहाज सिददिकि आ फालांगि नि सोमोन्दै सरायदेउ पुलिस थाना नि सिंनि गुदामघात आव सुरज आलि मुंनि सासे सेंग्रा जों सावरायलायदोंमोन, सावरायलायनाय आ सोलिबाय थानाय समाव नो सुरज आलि खौ थांखिनानै गरनै गुलि गावो, बे गुलि गावनाय आव सुरज आ बारगयो, नाथाय बेनि उनाव बो गोबौ हाथियार जों गाग्लोबो, गुलि नि सोदोब खोनानानै जाथायसालि आव जायगा नि सुबुंफोरा थांनानै बिसोरखौ हमो आरो पुलिस लिंहरना हरो।

आसाम आव जोनोम मोननाय पाकिस्तान नि नाईतिंगेल नाय्यारा नुर नि जिउ गोमाबाय काराछि आव। दिनै 71 बोसोर बैसो आव जिउ गोमायो बिथांनि। बिथाङा बुलबुल ई पाकिस्तान मुं जों मिथिजायोमोन, 1950 मायथाइ आव गुवाहाति आव जोनोम मोननाय नाय्यारा आरो बिथांनि नखर आ 1958 मायथाइ आव पाकिस्तान आव थाङो. बिथांनि बिफा या अल ईन्दिया मुस्लिम लिग नि सोद्रोमा मोन, आसाम आव फांलांगियारि खामानि नि थाखाय फैनानै थादोंमोन। नाय्यारा या सासे मुंदांखा मेथाय खनगिरिमोन, उन्दै समनिफ्राय नो मेथाय जों सोमोन्दो दंमोन. बिथांनि जिउ गोमानाय आव गोबाङानो दुखु मोननाय फोरमायदों।