Bodo news 17 Aug 2022 ~ Bodoinfo.com

मोनसे दुखुनांथांव खौरां, नखरसे नि नो सा 3 बर सुबुंफोरनि जिउ गोमाबाय। उदालगुरि जिला नि माजबात नि आसाम अरुनाशल सिमना नि निजरा ओनसोल आव जादों जाथाय आ, माजबात पुलिस थाना नि सिंनि निजरा ओनसोल नि कमलाबारि आव हाग्रा नि मैदेर नि गाग्लोबनाय आव नो जिउ गोमायो सा 3 बर सुबुंफोरनि, सा 3 थैनायनि मुङा नबिन बसुमतारि 53, यामिनि बसुमतारि 33 आरो हादानशा बसुमतारि 1 बोसोर 6 दान नि। मिथिना मोननाय बादिब्ला हर आव उन्दुना थानाय समाव नो मैदेर फोरा गाग्लोबदोंमोन, हाग्रानिफ्राय फैनाय मैदेरफोरा न बां गासैखौबो सिफायलांजोबो, गुबुनफारसे मैदेरनि गाग्लोबनाय आव बे नखर नि नो 7 बोसोर बैसो नि निजरा बसुमतारि आ बारगयो, निजरा बसुमतारि आ 7 बोसोर बैसो आव नो मावरिया जानांबाय, दुखुनांथाव, एबसु नि माजबात आन्सलिक कमिति आ दुखु मोननाय फोरमायनायजों लोगोसे सोरखार खौ निजरा बसुमतारि नि थाखाय बेबस्था लानो खावलायदों, लोगोसे सिमना ओनसोल आव हाग्रा नि जुनार नि उदखार आ बारा जानायखौ होबथानायनि बेबस्था लानोबो खावलायो।

रायजो आव घुस लानाय सोरखारि अफिसार मावथि फोरनि बेरेखा गोरा जागासिनो पुलिस प्रसासन आ, जायनि थाखाय घुस लानाय समाव गोबां सोरखारि अफिसार मावथि फोरा हमजागासिनो। दिनै बुधबार सान आव बो सासे सोरखारि अफिसार आ हमजाबाय, दिनैनि हमजानाय आ बर सुबुं, कामरुप रुराल नि रानि खोन्दो गुदि सोलोंथाय नि अफिसार ललित बसुमतारि खौ हमो, सार्भिस बुक आपदेत खालामनाय आरो एलपिसि ईशु नि मुङाव रां लादोंमोन लासित बसुमतारि आ, नोगोद 4 रोजा रां लानाय समाव नो जाख्लनाय होबथाग्रा बिफान आ हमो, लोगोसे मावखुलि नि बाहेराव लाखिना दोननाय बलेरो गारि निफ्राय 1 लाख रां बो मोननायजों लोगोसे बिनि न आव बो नायगिरनाय जादों होनना मिथिना मोनदों, लासित बसुमतारि आ बे दान नि हमजानाय 11 थि सोरखारि साख्रि मावनाय सुबुं।

बाक्सा याव 100 केजि लिरथाय नि 14.9 फुत सो गोलाव अजगर जिबौ मोननाय जादों, जिबौ नि जाथो खौ बार्मिज पाईथन होनना मिथिना मोनदों, हाग्रा बिफान नि मदद आव मानास मावजिगेन्द्रि ईको तुरिजम शसाईति नि मोनसे बासायनाय दोलो आ मोजाङैनो बासायनो हायो, 100 केजि फ्राम लिरथाय नि बे अजगर खौ हातिजान-दाउधारा गामि आव मोनदों, 14.9 फुत गोलाव, खौरां मोननाय लोगो लोगो नो बेखौ नुनाय जायगा याव थांनानै बासायो, उनाव मानास माहारियारि हाग्रामा याव हगारना होनाय जायो होनना मिथिना मोनदों।

उदांश्रि सान आ जोबनानै थांबाय, नाथाय गारि मथर निफ्राय फिरफिला खौ बोख्लायनाय जायासै दासिमबो, बेनि थाखाय नो लक्षिमपुर पुलिस आ आखाय आव लाबाय मोनसे खामानि, सम्बारखालि हादोरनाङैनो 76 थि उदांश्रि सान खौ फालिनाय जायो, बे बोसोर आव इसे आलादायै फालिनाय नुनो मोनदों, हादोरनि उदांश्रि आ 75 बोसोर जानाय आव आजादि कि अमृत महोस्तब फालिनाय जादोंमोन, जायनि थाखाय हर घर तिरंगा अभियान खौ सालायनाय जादोंमोन, उदांश्रि सान नि सिगां फिरफिला खौ लानानै गोबां आयेन सिफायनाय नुनो मोनदोंमोन, सोरबा बा गाब नि बेलेबेजे, अशोक चक्र नि बेलेबेजे बेफोरनि गोबां सावगारि भिदिअ भाइरेल जानायखौ नुनो मोनदोंमोन, दायो उदांश्रि सान नि उनाव बो फिरफिला खौ बोखारि खौ नुनो मोनदों, बेनि थाखाय नो लक्षिमपुर पुलिस आ राजालामा नि बाईक, ई रिक्सा, अत, बायदि आव लागायनाय फिरफिला खौ बोख्लायो, हादर नि नेम बादियै सान हाबनायनि सिगां आव नो फिरफिला खौ बोख्लायनो नांगौ, नाथाय बे नेम खौ गोबांखौ नो फालिनाय नुनो मोनाखै।

बिलासिपारा याव मोनसे सोमोनांथाव जाथाय, सासे फोरोंगिरि नि गाज्रि खामानि आ बयखौबो सोमोनांहोदों। ओनसोल नि बान्धवपारा नि थागिबि आरो सोरखारि फरायसालि नि फोरोंगिरि जाकिर हुसेईन आ गावनि फरायसालि नि नो सासे 13 बोसोर बैसो नि फरायसुलि खौ किदनेप एबा खावना लांनायनि अजद, जाथाय नि सायाव फरायसुलि नि नखर आ धुबुरि बन्दिहाना पुलिस आउतपस्त आव एजाहार होबाय, एजाहार नि उनाव नायबिजिरनाय आव पुलिसफोरा मैया हिनजावसा खौ सिरियै लाखिखुमाना दोननाय अबस्था याव कृष्णनगर निफ्राय बासायनो हायो, नाथाय लम्पत फोरोंगिरि आ दासिमबो खारखुमाना दं, मखजाथावदि बन्दिहाना पुलिस तक नि सिंनि बाहिर शालमारा एमभि फरायसालि आव खुंनाय उदांश्रि सान नि हाबाफारि नि उनाव नो गोमाना थानायनि अजद, दायो बे फोरोंगिरि खौ हमनानै साजा होनो दाबि दैखांदों रायजोफोरा।